Álıhan Smaıylov Otbasynyń tsıfrlyq kartasyn jetildirýdi tapsyrdy
«Áleýmettik saıasat ótinim berý formasynan proaktıvti formatqa kóship jatyr. Bul mindet Otbasynyń tsıfrlyq kartasy arqyly júzege asyrylady. Ol kezde aqparattyq júıe arqyly áleýmettik qoldaý alý qajettiligi anyqtalatyn bolady. Osyǵan oraı Eńbek mınıstrligi Tsıfrlyq damý mınıstrligimen birge Otbasynyń tsıfrlyq kartasyn jetildirý jumysyn jalǵastyrýy qajet. Onyń jumysynyń tıimdiligi senimdi derekterge baılanysty», - dedi Úkimet basshysy búgin Eńbek jáne halyqty áleýmettik qorǵaý mınıstrliginiń keńeıtilgen alqa májilisinde.
Álıhan Smaıylovtyń atap ótýinshe, ol úshin Tsıfrlyq damý mınıstrligi bir aıdyń ishinde memlekettik organdardyń aqparattyq júıesin Tsıfrlyq kartamen kezeń-kezeńimen yqpaldastyrý jol kartasyn jáne kestesin pysyqtaýy tıis.
«Ádilet, Іshki ister, Oqý-aǵartý, Ǵylym jáne joǵary bilim, Aýyl sharýashylyǵy mınıstrlikteri vedomstvolyq málimetter bazasyn ózektendirýdi qamtamasyz etýi ári únemi baqylaýda ustaýy qajet», - dedi Premer-Mınıstr.