Álıhan Smaıylov munaı-gaz mashınalaryn jasaý salasyndaǵy ımport kólemin qysqartýdy tapsyrdy

ASTANA. QazAqparat – Mashına jasaý salasyndaǵy jabdyqtardyń 40 paıyzǵa jýyǵy tozǵan. Bul týraly búgin Úkimet otyrysynda Premer-Mınıstr Álıhan Smaıylov aıtty, dep habarlaıdy QazAqparat tilshisi.

«Taǵy bir mańyzdy másele – jabdyqtardyń tozý deńgeıi óte joǵary bolyp otyr. Mashına jasaý salasyndaǵy bul kórsetkish orta eseppen 40 paıyzǵa jýyq. Sondyqtan, ony múmkindiginshe jańǵyrtý kerek. Eń aldymen, shaǵyn jáne orta bıznes úshin qarjy kózderi qoljetimdi bolýy tıis. Onyń ishinde Ónerkásipti damytý qorynyń jelisi boıynsha qarjylandyrý júıesin jetildirý kerek», - dedi Premer-Mınıstr.

Onyń atap ótýinshe, munaı-gaz mashınalaryn jasaý sektorynyń da damý áleýeti joǵary. Qazir bul saladaǵy óndiris kólemi shamamen 160 mln dollardy quraıdy. Al, ımport 1,6 mlrd dollardan asady.

«Kórip otyrǵanymyzdaı, ondaǵan ese aıyrma bar. Ony barynsha qysqartý kerek. Otandyq jańa óndiristerdi qurýǵa járdemdesý úshin 2020 jyly iri jer qoınaýyn paıdalanýshylarmen birlesip, Halyqaralyq munaı-gaz mashına jasaý ortalyǵy ashyldy. Jergilikti óndirýshilerdiń áleýeti men joǵary qyzyǵýshylyǵyn eskere otyryp, osy baǵyttaǵy jumysty kúsheıtý qajet», - dedi Álıhan Smaıylov.

Osyǵan deıin Saranda teledıdar, shańsorǵysh jáne kir jýatyn mashına shyǵaratyn zaýyt iske qosylatyny habarlandy.