Álıhan Smaıylov Qytaıdyń Qazaqstandaǵy Elshisimen kezdesti

ASTANA. QazAqparat - QR Premer-Mınıstri Álıhan Smaıylov QHR-dyń Qazaqstandaǵy Tótenshe jáne Ókiletti Elshisi Chjan Sıaomen kezdesý ótkizdi. Bul týraly QazAqparat Úkimettiń saıtyna silteme jasap habarlaıdy.

Taraptar saýda-sattyq, ınvestıtsııalar tartý, ónerkásip, energetıka, aýyl sharýashylyǵy, kólik jáne logıstıka, tsıfrlyq tehnologııalar, transshekaralyq ózenderdi paıdalaný jáne t. b. salalardaǵy memleketaralyq yntymaqtastyqtyń keń aýqymdy máselelerin talqylady.

Premer-Mınıstr Qazaqstannyń jalpy taýar aınalymynyń 18%-yn quraıtyn Qytaı elimizdiń iri saýda seriktesteriniń biri ekenin atap ótti. Sondaı-aq QHR memleketimizdiń ekonomıkasyna ınvestıtsııa salatyn TOP-5 eldiń qataryna kiredi.

Sonymen qatar Álıhan Smaıylov Qazaqstan Úkimeti eki el basshylarynyń 2030 jylǵa qaraı ózara saýdany $35 mlrd-qa deıin ulǵaıtý jónindegi tapsyrmasyn oryndaý maqsatynda belsendi túrde jumys júrgizýge daıyn ekenin atap ótti.

«Bizdiń elderimizdiń aýyl sharýashylyǵy ónimderin jetkizý salasynda aıtarlyqtaı áleýeti bar. Qazaqstandyq kásiporyndar Qytaıǵa azyq-túlik taýarlarynyń eksportyn odan ári arttyrǵasy keledi. Osyǵan baılanysty saýda-sattyqqa qatysty kedergiler men shekteýlerdi ári qaraı alyp tastaý mańyzdy bolyp otyr», — dedi Premer-Mınıstr.

Óz kezeginde Chjan Sıao qytaılyq taraptyń Qazaqstannan aýyl sharýashylyǵy ónimderin ımporttaýǵa, temirjol tasymaly kólemin ulǵaıtýǵa, IT-sektordaǵy óńiraralyq ózara is-qımyl men áriptestikti nyǵaıtýǵa múddeli ekenin bildirdi.

Onyń aıtýynsha, qazirgi ýaqytta qazaqstandyq kompanııalarǵa Qytaıdyń iri saýda platformalaryna jáne jalpy QHR naryǵyna shyǵýǵa belsendi kómek kórsetilýde.

«Biz ekonomıkalyq qarym-qatynastarymyzdy sapaly jańa deńgeıge shyǵarý úshin zor áleýet bar dep sanaımyz. Aldymyzǵa jańa, bıik maqsattar qoıýymyz kerek», — dedi Chjan Sıao.

Kezdesý barysynda taraptar «Qorǵas» ShYHO-nyń jumysyn qalpyna keltirý, «Baqty-Pokıtý» avtomobıl ótkizý beketi aýdanynda úshinshi temir jol ótkelin ashý, Transkaspıı halyqaralyq iri avtomobıl joldaryn salý jáne mashına jasaý salasynda jańa óndiristerdi qurý máselelerin qozǵady.

Sonymen qatar taıaý bolashaqta Astana men Beıjiń arasynda aptasyna úsh reıs jıiligimen áýe qatynasyn qalpyna keltirý jáne azamattardyń ózara saparlary kezindegi rásimderdi ońaılatý josparlanyp otyrǵany atap ótildi.