Álıhan Smaıylov Qytaı elshisimen kezdesti

NUR-SULTAN. QazAqparat - QR Premer-Mınıstri Álıhan Smaıylov QHR-dyń QR-daǵy elshisi Chjan Sıaomen kezdesti. Bul týraly QazAqparat Úkimettiń saıtyna silteme jasap habarlaıdy.

Saýda-ekonomıkalyq, kólik-logıstıkalyq, AÓK, «jasyl ekonomıkany» damytý, tsıfrlandyrý, transshekaralyq ózenderdi tıimdi paıdalaný jáne t. b. salalardaǵy ekijaqty yntymaqtastyqtyń ózekti máseleleri talqylandy. Qytaıǵa Qazaqstannan ekologııalyq taza aýyl sharýashylyǵy ónimderin jetkizý kólemin ulǵaıtý, sondaı-aq shekara mańyndaǵy ózara is-qımyldy odan ári arttyrý perspektıvalaryna erekshe nazar aýdaryldy.

Premer-Mınıstr jetkizý tizbegin qalpyna keltirý, Qazaqstan – Qytaı shekarasyndaǵy barlyq avtomobıl jáne temirjol ótkizý pýnktteriniń úzdiksiz jumysyn qamtamasyz etý, sonymen qatar QR men QHR arasyndaǵy tikeleı áýe qatynasyn qalpyna keltirý qajettiligin atap ótti.

«Memleket basshysy Qazaqstan ekonomıkasyn «qaıta qaraý» jáne syrtqy basty seriktestermen, sonyń ishinde Qytaımen saýda-ekonomıkalyq yntymaqtastyqty jandandyrý jóninde aldymyzǵa birqatar mindet qoıdy», — dedi Á. Smaıylov.

Chjan Sıao Qazaqstanmen yntymaqtastyq Qytaıdyń syrtqy saıasatyndaǵy basym baǵyttardyń biri ekenin atap ótti. QHR Qazaqstannyń senimdi seriktesi bolyp qala beredi jáne qajetti qoldaý men járdem kórsetýge daıyn. Qytaı — Qazaqstannyń iri syrtqy saýda jáne ınvestıtsııalyq seriktesteriniń biri. 2021 jyldyń 11 aıynda ekijaqty saýda kólemi $17 mlrd-tan asyp, 13,6%-ǵa ósti.