Álıhan Smaıylov: Qyrǵyzstan – Qazaqstannyń Ortalyq Azııadaǵy mańyzdy saýda seriktesi

NUR-SULTAN. QazAqparat - Qazaqstan Respýblıkasynyń Premer-Mınıstri Álıhan Smaıylov Eýrazııalyq úkimetaralyq keńes otyrysy aıasynda Qyrǵyzstan Respýblıkasynyń Mınıstrler kabınetiniń tóraǵasy Aqylbek Japarovpen ekijaqty kelissóz ótkizdi. Bul týraly QazAqparat Úkimettiń baspasóz qyzmetine silteme jasap habarlaıdy.

Taraptar saýda-ekonomıkalyq jáne ınvestıtsııalyq yntymaqtastyq, ónerkásip jáne otyn-energetıka kesheni, ekologııa, bilim berý salasyndaǵy ekijaqty yntymaqtastyqtyń birqatar ózekti máselelerin talqylady.

Ekijaqty saýda kólemin arttyrý aıasynda taraptar jetkiziletin aýyl sharýashylyǵy ónimderiniń nomenklatýrasyn keńeıtý jóninde pikir almasty. Budan basqa, birlesken ındýstrııalyq saýda-logıstıka keshenin qurý máselesin iske asyrý bastaldy.

«Qyrǵyzstan – Qazaqstannyń Ortalyq Azııa aımaǵyndaǵy mańyzdy saýda seriktesi. Ózara saýdanyń oń serpininiń qalpyna kelýin atap ótkim keledi. 2021 jyldyń qorytyndysy boıynsha saýda kóleminiń shamamen 15%-ǵa artqany baıqalady», — dedi Álıhan Smaıylov kelissóz kezinde.

Avtomobıl ónerkásibi boıynsha yntymaqtastyq sheńberinde qyrǵyz tarapy avtokólik tehnıkasyn satyp alý jáne lızıng máselesin qarastyrýda. Qazirgi ýaqytta tehnıkalyq máseleler pysyqtalyp jatyr.

Transshekaralyq sýlar jáne energetıkalyq yntymaqtastyq boıynsha taraptar transshekaralyq ózenderdiń aǵysy máselesin rettedi, sonyń nátıjesinde eki memleket úshin de vegetatsııalyq kezeńde Syrdarııa, Shý jáne Talas ózenderiniń basseınderinde sýdyń azaıýynyń yqtımal teris saldarynyń aldyn alý sharalary qabyldandy.

Budan basqa, taraptar ózge de ózekti máseleler men saýda-ekonomıkalyq yntymaqtastyqty keńeıtý jóninde pikir almasty.