Álıhan Smaıylov kóleńkeli ekonomıkamen qalaı kúresetindigin aıtty

ASTANA. QazAqparat - Búgin Úkimettiń keńeıtilgen otyrysynda Qarjy mınıstri Álıhan Smaıylov kóleńkeli ekonomıkany joıý úshin qandaı sharalar qabyldanatyndyǵyn aıtty, dep habarlaıdy QazAqparat tilshisi.

«Shyndyǵynda da Qytaı Halyq Respýblıkasy derekterimen aıyrmashylyq 6,9 mlrd dollardy quraıdy. Onyń 3,3 mlrd dollaryn Qazaqstan arqyly shetelge ótetin tranzıt qurap otyr. Qytaı tarapy ony Qazaqstan eksporty retinde kórsetedi. Bul Reseı men Qytaı statıstıkalary arqyly dáleldengen. 1 mlrd dollar - bul Qazaqstan azamattarynyń «Qorǵas» ShYHO arqyly elimizge ákelgen taýarlary. 2,6 mlrd dollar - bul shynymen de deklaratsııalyq qunyn tómendetý. Bıýdjettiń bir jylda joǵaltatyn qarajat 205 mlrd teńgeni quraıdy», - dedi Qarjy mınıstr.

Álıhan Smaıylov munsha qarajattyń bıýdjetke túspeı qalýyn boldyrmaý úshin naqty jumystar júrgizilip, keshendi sharalar qolǵa alynǵanyn aıtty.

«Birinshiden, Qazirgi ýaqytta qytaı tarapymen deklaratsııany elektrondy túrde alý úshin kelissóz júrgizip jatyrmyz. Ekinshiden, júkterdi Qazaqstan shekarasyndaǵy kólik-logıstıkalyq ortalyqtarda tıeý máselesi talqylanýda. Sol jerde kedendik baqylaý júrgiziletin bolady. Úshinshiden keden organdarynda sıtýatsııalyq ortalyqtar quramyz. Olar bizge bul máseleni túbegeıli ózgertýge múmkindik beredi. Aǵymdaǵy jyldyń qorytyndysynda keden bóliginde bıýdjetke qosymsha 200 mlrd teńge túspek», - dedi Álıhan Smaıylov.