Álıhan Smaıylov J.P. Morgan jáne TotalEnergies basshylarymen kezdesti

NUR-SULTAN. QazAqparat - QR Premer-Mınıstri Álıhan Smaıylov QR Prezıdenti janyndaǵy Sheteldik ınvestorlar keńesiniń 34-shi plenarlyq otyrysy aıasynda J.P. Morgan ınvestıtsııalyq banki men TotalEnergies SE frantsýz munaı-gaz kompanııasy ókilderimen kezdesti.

Bul týraly QazAqparat QR Úkimetiniń resmı saıtyna silteme jasap habarlaıdy.

TotalEnergies SE aǵa vıtse-prezıdenti Jýlıen Pýjemen áńgimelesý barysynda kompanııanyń Qazaqstandaǵy munaı-gaz salasyndaǵy qyzmeti, jel energetıkasyndaǵy jobalardy iske asyrý jáne ekonomıkany dekarbonızatsııalaý máseleleri talqylandy.

TotalEnergies SE – elimizdegi eń iri ınvestorlardyń biri, Qashaǵan jáne Dońǵa jobalaryna belsendi túrde qatysyp keledi. Budan bólek, kompanııa Qyzylorda jáne Jambyl oblystarynda kún energetıkasy salasynda eki jobany iske asyrdy.

«Sizderdiń Qazaqstanǵa degen qyzyǵýshylyqtaryńyzdy qoldaımyz jáne munaı-gaz salasyndaǵy ınvestıtsııalyq josparlardy iske asyrýǵa kómek kórsetýge daıynbyz», — dedi Álıhan Smaıylov.

J.P. Morgan kompanııasynyń Reseı jáne TMD elderindegi prezıdenti ıAn Tavrovskıımen jahandyq makroekonomıkalyq ahýal, halyqaralyq qarjy uıymdarymen ózara is-qımyl, Qazaqstannyń álemdik kapıtal naryǵyna shyǵý jónindegi josparlary talqylandy.

Úkimet basshysy J.P. Morgan kompanııasynyń Qazaqstanda 20 jyl boıy jumys istep kele jatqanyn jáne osy ýaqyt ishinde klıentterdiń eń kúrdeli máselelerin sheshýge qabiletti senimdi jáne turaqty seriktes retinde tanylǵanyn atap ótti.

«Biz úshin dekarbonızatsııalaý aıasynda aǵymdaǵy josparlardy iske asyrý óte mańyzdy. J.P. Morgan quzirettiligin ESG standarttaryn ázirleý jáne olardy jobalarymyzda durys qoldaný úshin paıdalanǵymyz keledi», — dedi Álıhan Smaıylov.