Álıhan Smaıylov Eýropanyń IT ýnıversıtetterin Qazaqstanǵa shaqyrdy

ALMATY. QazAqparat – Qazaqstan 2025 jylǵa qaraı kem degende 100 myń joǵary bilikti IT-maman daıarlaýdy josparlap otyr. Bul týraly Premer-Mınıstr Álıhan Smaıylov Almatyda ótken «Eýropalyq odaq – Ortalyq Azııa» ekinshi ekonomıkalyq forýmynda málim etti, dep habarlaıdy QazAqparat tilshisi.

Premerdiń aıtýynsha, tsıfrlandyrý – ekonomıkany damytýdyń negizgi draıverleriniń biri. Qazaqstan ózine eýrazııa keńistigindegi eń iri tsıfrlyq habtardyń birine aınalý strategııalyq mindetin qoıdy.

«Byltyr elimiz Úkimetter damýynyń BUU ındeksinde 28-shi orynǵa ıe boldy. Bul – óńirdegi jáne TMD elderi arasyndaǵy eń joǵary kórsetkish. Qazaqstanda tsıfrlyq transformatsııany damytý úshin qolaıly jaǵdaılar jasalyp jatyr. Biz bank júıesin qurdyq. Tsıfrlyq kommertsııa da qarqyndy damyp keledi», - dedi Úkimet basshysy.

Álıhan Smaıylov Microsoft korporatsııasy Qazaqstanda ornalasatyn mýltıaımaqtyq hab ashýǵa daıyn ekenin jetkizdi. Ol Ortalyq Azııa elderinen bólek, Ázerbaıjan, Armenııa, Grýzııa jáne Pákistan elderin de qamtıtyn bolady.

«Osy turǵyda Qazaqstan «Global Gateway», «Team Europe» jobalaryna jáne Eýropalyq odaqtyń Ortalyq Azııamen tsıfrlyq baılanys jónindegi bastamasyna belsendi qatysýǵa daıyn. Qazaqstan qazirdiń ózinde eýropalyq spýtnıktik kompanııalarǵa aımaqtyq hab qurý úshin alań usyndy. 2025 jylǵa qaraı biz kem degende 100 myń bilikti IT-mamanyn daıyndaýdy josparlap otyrmyz. Osy múmkindikti paıdalana otyryp, eýropalyq IT ýnıversıtetterin Qazaqstanda óz fılıaldaryn ashýǵa shaqyramyn. Osylaısha, Astana Hub tehnoparki belsendi aımaq retinde yńǵaıly alańǵa aınala alady», - dedi Álıhan Smaıylov.