Álıhan Smaıylov Eýrazııalyq damý banki keńesiniń otyrysyn ótkizdi

NUR-SULTAN. QazAqparat - 24 maýsymda QR Premer-Mınıstri Álıhan Smaıylovtyń tóraǵalyǵymen Eýrazııalyq damý banki (EADB) keńesiniń otyrysy ótti, onda Banktiń 2021 jylǵy jumysynyń qorytyndylary qaraldy, dep habarlaıdy QazAqparat.

QR Úkimetiniń baspasóz qyzmetiniń habarlaýynsha, máselen, ótken jyly bank 19 jańa joba boıynsha kelisimderge qol qoıdy. Bul rette aǵymdaǵy ınvestıtsııalyq portfelde ıntegratsııalyq áseri bar jobalardyń úlesi 59,6%-dy qurady. EADB-nyń 2021 jylǵy taza paıdasy – $37,1 mln, bul jospardan 2,1 ese artyq.

2022 jyldyń basynda álemdegi, sondaı-aq jergilikti qarjy jáne taýar naryqtaryndaǵy qubylmalylyq jaǵdaıynda EADB turaqty qarjylyq jaǵdaıdy jáne 2022-2026 jyldarǵa arnalǵan strategııanyń mindetterin iske asyrý múmkindikterin saqtap qalǵany atap ótildi.

EADB jobalar boıynsha jańadan qol qoıý josparyn oryndaýǵa nıetti. Ázirlengen 5 jyldyq eldik strategııalar aıasynda Qazaqstanda, Armenııada, Tájikstanda jáne Qyrǵyzstanda jobalardy damytýǵa erekshe nazar aýdarylmaq.

«Bank qyzmeti qazirgi jaǵdaılarǵa saı naqtylanyp, ekonomıkalyq ósimdi qamtamasyz etý jáne saýda-ekonomıkalyq baılanystardy odan ári keńeıtý úshin eýrazııalyq óńir elderine kómek kórsetýge baǵyttalýy tıis», - dedi Keńes tóraǵasy, QR Premer-Mınıstri Álıhan Smaıylov.

Sonymen qatar otyrysqa qatysýshylar Tekserý komıssııasynyń jáne Banktiń Іshki aýdıt qyzmetiniń esepterin, sondaı-aq basqa da birqatar máselelerdi qarady.

Keńes otyrysy qarsańynda EADB basqarma tóraǵasy Nıkolaı Podgýzov Álıhan Smaıylovqa eýrazııalyq keńistiktegi negizgi ınvestıtsııalyq megajobalar boıynsha jasalǵan jumystardy tanystyrdy.