Álıhan Smaıylov: Eshbir ózekti suraq jaýapsyz qalmaıdy

NUR-SULTAN. QazAqparat - QR Premer-Mınıstri Keńsesine qoıylǵan árbir suraq pen kóterilgen árbir problemany muqııat zerdeleýge tapsyrma berdim. Bul týraly Úkimet basshysy Álıhan Smaıylov Facebook-tegi paraqshasynda jazdy, dep habarlaıdy QazAqparat.

«Belsendilik tanytyp, suraq qoıyp jatqandaryńyzǵa alǵys bildiremin. QR Premer-Mınıstri Keńsesine qoıylǵan árbir suraq pen kóterilgen árbir problemany muqııat zerdeleýge tapsyrma berdim.

Ókinishke qaraı, jumys babyna baılanysty sizderdiń barlyq suraǵyńyzǵa jeke jaýap bere almaýym múmkin. Dese de, eshbir ózekti suraq jaýapsyz qalmaıtynyn jáne olarǵa quzyrly organdar mindetti túrde jaýap beretinin jetkizgim keledi», - dedi Álıhan Smaıylov.

Eske salsaq, keshe QR Úkimet basshysy Facebook jelisinde jeke paraqshasyn ashyp, «Jazylyńyzdar, suraq qoıyńyzdar, ıdeıalar usynyńyzdar. Múmkindiginshe saýaldaryńyzǵa jaýap berip, qajetti sheshimderdi qabyldaımyn», - dep jazba qaldyrǵan bolatyn.