Álıhan Smaıylov elektr jelileriniń jaı-kúıin taldaýǵa eki apta ýaqyt berdi
«Energetıka mınıstrligi óńir ákimderimen birlesip, jylý kózderin jóndeý merzimin aýystyrmaı, jylytý maýsymyna tolyq daıyndyqty qamtamasyz etý qajet. Indýstrııa mınıstrligi óńir ákimderimen birlesip, jylý jelilerindegi jóndeý jumysyn aıaqtaý úshin búkil qajetti sharalardy qabyldaýy tıis. Bıylǵy jobalardy iske asyrýǵa bıýdjet qarajatyn bólý kezinde bıýrokratııaǵa jol berilmeýi kerek», - dedi Álıhan Smaıylov Úkimet otyrysynda.
Sonymen qatar Úkimet basshysy jaýapkershilik máselesin kóterdi.
«Energetıka mınıstrligi múddeli organdarmen birlesip, jylý energetıkasy jónindegi zań jobasy sheńberinde bekitilgen jóndeý kestesin buzǵany úshin energııa óndirýshi uıymdarǵa jaýapkershilik belgileý máselesin pysyqtaý kerek. Tarıfti bekitý kezinde berilgen ótinishterdiń negizdiligin jáne stantsııadaǵy naqty jaǵdaıdy anyqtaýǵa múmkindik beretin keshendi tásil qajet. Energetıka jáne Ulttyq ekonomıka mınıstrlikteri 2 apta ishinde óńirlik elektr jelilik kompanııalardyń tehnıkalyq jaı-kúıine taldaý júrgizip, táýekelder kartasyn ázirleýi kerek», - dedi ol.
Onyń aıtýynsha, kartada problemalardy sheshý joldary kórsetilýge tıis.
«Óńir ákimderi jylytý maýsymyna daıyndyq jónindegi óńirlik shtabtardyń jumysyn túgel qaıta qaraýy kerek. Jyl saıyn olardyń jumysynda naqty ister emes, naýqanshyldyq oryn alyp otyr. Olar qaǵaz júzinde bar, al jóndeý jumystaryna qatysy joq», - deıdi ol.