Álıhan Smaıylov Elbasy Úkimet otyrysynda protokoldy nelikten buzǵanyn túsindirdi
«Meniń jaqynyraq otyrýym úshin jasalǵan joq. Bul, Qarjy mınıstrliginiń mártebesin kóterý úshin arnaıy jasalǵan bolatyn. Qarjylandyrý máselesine laıyqty nazar aýdarý tóńireginde boldy. Sondyqtan Memleket basshysy protokoldy ózgertip, Qarjy mınıstrin vıtse-premerlerge jaqyn otyrǵyzý týraly sheshim qabyldady», - dedi Á.Smaıylov Úkimet úıindegi baspasóz máslıhatynan keıin.
Sonymen qatar ol sol jıynda Elbasy Qytaıdyń kedendik statıstıkasy men Qazaqstan statıstıkasynda aıyrmashylyq úlken ekendigin aıtqandyǵyn eske saldy.
«Men mundaı aıyrmashylyqtyń sebepteri nede ekendigin jáne ne jasaǵaly jatqandyǵymyzdy baıandadym. Aldymyzǵa qoıǵan mindetti oryndaı alatyn bolsaq, onda shamamen 200 mlrd teńge qosymsha túsimdi qamtamasyz etemiz», - dedi mınıstr.
Esterińizge sala ketsek, 30 qańtardaǵy Úkimettiń keńeıtilgen otyrysynda Elbasy Nursultan Nazarbaev protokoldy buzyp, ústeldiń tómen jaǵyna jaıǵasqan Qarjy mınıstrin joǵary otyrǵyzǵan edi.
«Baqytjan (Úkimet basshysy Saǵyntaev), Qarjy mınıstri ústeldiń sońynda emes, vıtse-premerlerden keıin otyrýy tıis. Orny sol jerde. Ádette, Qarjy mınıstri Premer-Mınıstrdiń orynbasary bolady. Al, qarashy, sen qaıda otyrǵyzǵansyń? Protokoldy kim jasady? Men qazir protokoldy buzamyn», - degen edi Nursultan Nazarbaev.