Álıhan Smaıylov bıýdjettiń kiris bóligin ulǵaıtý jumystary qalaı júretinin aıtty
«Nur Otan» partııasynyń saılaýaldy baǵdarlamasynda qoıǵan jáne iske asyrylýy tıis bıýdjet shyǵystarynyń ulǵaıtýdy talap etetin mindetterdi eskere otyryp, Úkimet respýblıkalyq bıýdjettiń teńgerimdi bolýyn qalaı qamtamasyz etedi», - dep surady depýtat Marat Qusaıynov.
Óz kezeginde QR Premer-Mınıstriniń birinshi orynbasary Álıhan Smaıylov ótken jyly Ulttyq qor qaýipsizdik qorǵanysy retinde jumys istegenin, bul óz kezeginde áleýmettik ári epıdemıologııalyq is-sharalardy iske asyrýǵa, ekonomıkany, halyqty, kásipkerlerdi qoldaýǵa múmkindik bergenin atap ótti.
«Bıyl ekonomıkany qoldaý úshin tıisti sharalar qabyldaý qajettigi týyndaýy múmkin. Sebebi koronavırýsqa baılanysty shekteý qadamdary jalǵasyp keledi. Sonymen birge Úkimettiń aldynda «Nur Otan» partııasynyń saılaýaldy baǵdarlamasyn iske asyrý mindeti tur. Ol úshin qosymsha qarjylandyrý kerek. Aldymyzdaǵy bes jyldyń ishinde baǵdarlamany júzege asyrý úshin 21 trln teńge qajet. Bul turǵyda bıýjettiń kiris bóligin ulǵaıtý jumystary júrgiziledi. Negizinen salyq, kedendik ákimshilendirýdi ary qaraı tsıflandyrý jumystary, sondaı-aq «kóleńkeli» ekonomıkany qysqartý boıynsha arnaıy keshendi jospardy iske asyrý esebinen bolady», - dep túsindirdi Á. Smaıylov.
Sonymen qatar ol bıýdjet shyǵystaryn ońtaılandyrý jalǵasatynyn aıtty.
«Sońǵy eki jylda 3,5 trln teńgege bıýdjet shyǵystaryn ońtaılandyrdyq. Bul jumysty jalǵastyramyz. Arnaıy ádisnama ázirlendi, aqparattyq júıe Qarjy mınıstrliginde daıarlandy. Munymen qosa, Úkimet ınvestıtsııa tartý jumystaryn júrgizip jatyr. Aldymyzdaǵy 5 jylda 118 trln teńgege ınvestıtsııa tartylady», - dedi Premer-Mınıstrdiń birinshi orynbasary.