Álıhan Smaıylov bıýdjettik josparlaýdyń protsesterin tsıfrlandyrý is-sharalar qabyldaýdy tapsyrdy

NUR-SULTAN. QazAqparat – Osy jyldyń 1-shi naýryzyna deıin bıýdjettik josparlaýdyń protsesterin tsıfrlandyrý boıynsha naqty is-sharalar qabyldaýy kerek. Bul týraly Úkimet otyrysynda QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Memleket basshysy Qasym-Jomart Toqaev elimizdiń osy jylǵa arnalǵan negizgi áleýmettik-ekonomıkalyq damý basymdyqtaryn aıqyndap berdi. Úkimettiń eń mańyzdy mindetteriniń biri – halyqtyń tabysyn arttyrý jáne jańa jumys oryndaryn qurý. Sondyqtan, memlekettik organdardyń birinshi basshylary myna máselelerdi sheshýge basty nazar aýdarýy qajet. Birinshi. Prezıdent bıýdjettik josparlaýdy reformalaýǵa qatysty birqatar tapsyrmalar berdi. Josparlaý tıimdiligin arttyrý úshin bıýdjettik protsesterdi tsıfrlandyrýdy jyldamdatý qajet», - dedi Úkimet basshysy.

Osy rette Premer-Mınıstr Qarjy mınıstrligine osy jylǵy 1-shi naýryzǵa deıin bıýdjettik josparlaýdyń protsesterin tsıfrlandyrý boıynsha naqty is-sharalardy qabyldaýdy tapsyrdy.

«Ekinshi. Tıimsiz ári shyǵyny kóp jobalardan bas tartýdy tapsyrdy. Sondaı-aq Qarjy jáne Ulttyq ekonomıka mınıstrlikteri ázirlep jatqan Bıýdjet qarajatynyń tıimdiligi men áleýmettik-ekonomıkalyq qaıtarymyn baǵalaý ádistemesin aıaqtaý kerek degen bolatyn. Qarjy mınıstrligi Strategııalyq josparlaý agenttigimen jáne Esep komıtetimen birge Ádistemeniń jobasyn 1-shi sáýirge deıin Úkimetke engizýi tıis», - dedi Álıhan Smaıylov.