Álıhan Smaıylov: Bızneske kóbirek erkindik berý – Úkimet jumysy basty baǵyttarynyń biri

NUR-SULTAN. QazAqparat - Beısenbi, 7 shildede, QR Premer-Mınıstri Álıhan Smaıylov kásipkerlik qyzmette «taza paraqtan bastap» retteýdi engizý jáne memlekettik baqylaý men qadaǵalaýdy avtomattandyrý máselesi jóninde keńes ótkizdi, dep habarlaıdy QazAqparat.

Keńes barysynda ulttyq ekonomıka mınıstri Álibek Qýantyrov qoǵamdyq tamaqtaný, saýda, qonaq úı qyzmetteri, kólik jáne aýyl sharýashylyǵy salalaryndaǵy retteýshi aktilerge júrgizilgen taldaýdyń bazalyq sharttarǵa sáıkes kelmeıtin basy artyq jáne birin-biri qaıtalaıtyn birqatar talaptardy anyqtaǵanyn málimdedi.

Aldaǵy aılarda taǵy alty baǵyt boıynsha, aqparat jáne baılanys, kompıýterlik baǵdarlamalaý salasy, jyljymaıtyn múlikpen jasalatyn operatsııalar, jınaqtaý, taý-ken ónerkásibi jáne qubyr kóliginiń qyzmetine taldaý júrgizý josparlanýda.

Premer-Mınıstr qazirgi ýaqytta bızneske kóptegen formaldy talaptar qoıylǵanyn atap ótti. Olardy tıisti baqylaýdy qamtamasyz etýge zııan keltirmeıtindeı etip alyp tastaýǵa bolady.

Álıhan Smaıylov mundaı talaptardyń bolýy eldegi iskerlik ahýalǵa keri áserin tıgizetinin, sondyqtan ortalyq memlekettik organdardyń «Atameken» UKP-men birlesip, retteýshi aktileri qysqartý boıynsha jumys júrgizýi tıis ekenin atap ótti.

«Memleket basshysy bizdiń aldymyzǵa bızneske kóbirek erkindik berý mindetin qoıdy. Bul – jańa ekonomıkalyq saıasatty qalyptastyrý aıasyndaǵy Úkimet jumysynyń basty baǵyttarynyń biri. Tekserýshi organdardyń formaldy belgilerine qarap bıznesti jaýapkershilikke tartýǵa múmkindigi bolmaýy tıis», — dedi Álıhan Smaıylov.

Osyǵan baılanysty Premer-Mınıstr tıisti organdarǵa qaıta qaraý jáne qysqartý arqyly qazaqstandyq normatıvtik-quqyqtyq bazany basy artyq talaptardan tazartý jónindegi jumysty jandandyrýdy tapsyrdy.

Sondaı-aq Álıhan Smaıylov Tsıfrlyq damý, ınnovatsııalar jáne aeroǵarysh ónerkásibi mınıstrliginiń memlekettik baqylaý men qadaǵalaýdy qamtamasyz etý kezinde táýekelderdi basqarýdyń avtomattandyrylǵan júıesin qurý boıynsha tásilderin maquldady.

«Tekserýshi vedomstvolar buzýshylyqtardyń qaýpi joǵary bolǵan kezde áreket etýi tıis. Bızneske ákimshilik júktemeni azaıtý jáne táýekelderdi basqarý júıesin iske qosý – júrgizilip jatqan reformadaǵy negizgi qadamdar. Ortalyq memlekettik organdardyń basshylaryna osy jumystyń nátıjeleri úshin jeke jaýapkershilik týraly taǵy da eskertemin», — dep túıindedi Premer-Mınıstr.

Foto: primeminister.kz