Álıhan Smaıylov baspana baǵasyn qalaı turaqtandyrýǵa bolatynyn aıtty

NUR-SULTAN. QazAqparat – Aldaǵy 5 jyldyń ishinde qurylys materıaldaryn shyǵarýǵa baǵyttalǵan 107 ınvestıtsııalyq joba iske asady. Bul týraly QR Premer-Mınıstri Álıhan Smaıylov aıtty, dep habarlaıdy QazAqparat tilshisi.

«Negizin aıtar bolsaq, memleket jyljymaıtyn múlik naryǵy baǵasyn rettemeıdi. Biraq, biz tıisti monıtorıng júrgizemiz. Sol naryq baǵasynyń ósýine ne óspeýine tikeleı yqpal etetin qurylys materıaldary ekeni belgili. Memleket osy qurylys materıaldary baǵasynyń óspeýine tıisti is-sharalar qabyldaýy kerek. Biz, mysaly bes jyldyń ishinde 107 ınvestıtsııalyq jobany iske asyramyz. Olardyń kólemi bir trln teńgege jetedi. Atalǵan ınvestıtsııalyq jobalar otandyq qurylys materıaldaryn shyǵarýǵa baǵyttalǵan», - dedi Úkimet basshysy «Qazaqstan» ulttyq telearnasynyń «Jańa Qazaqstan» baǵdarlamasyna bergen suhbatynda.

Onyń atap ótýinshe, atalǵan jumystardyń nátıjesinde elimizdiń qurylys salasyna qajetti materıaldardy shyǵarsaq, onda ol turǵyn úı baǵasynyń turaqtanýyna tikeleı áserin tıgizetin bolady.

«Bul baǵytta arnaıy jumys júrgizip jatyrmyz», - dedi Álıhan Smaıylov.

Osyǵan deıin Úkime basshysynyń zeınet jasyn tómendetýge qatysty pikirin bergen bolatynbyz.