Álıhan Smaıylov aýyldardy sýmen qamtý qujattaryn ýaqtyly daıyndaýdy tapsyrdy

NUR-SULTAN. QazAqparat – Búgin Úkimet otyrysynda QR Premer-Mınıstri Álıhan Smaıylov eldi mekenderdi sapaly aýyz sýmen qamtý jobalyq-smetalyq qujattaryn ýaqtyly daıyndaýdy tapsyrdy, dep habarlaıdy QazAqparat tilshisi.

Aıta keteıik, otyrysta QR Indýstrııa jáne ınfraqurylymdyq damý mınıstri Qaıyrbek Óskenbaev el turǵyndaryn sapaly aýyz sýmen qamtamasyz etý máselelerine oraı baıandama jasaǵan bolatyn.

«Jospar boıynsha biz 511 aýyldy sýmen qamtamasyz etýimiz qajet. Onyń ishinde 120 eldi mekendi bıyl sý kirgizemiz. Al qalǵan aýyldar boıynsha jobalyq-smetalyq qujattar daıyndalyp jatyr ma?», - dep surady Álıhan Smaıylov mınıstrden.

Qaıyrbek Óskenbaevtyń dereginshe, qazirgi ýaqytta 69 jobalyq-smetalyq qujat ázirlenip jatyr. Qalǵan 175 joba kelesi eki jyldyń enshisinde.

«Jergilikti ákimshiliktermen jumys istep jatyrmyz. 54 eldi mekende qujattyń daıyndalmaýyna aýyz sýdy zertteý jumystary kedergi keltirip otyr. Qalǵany oryndalady», -dedi ol.

Osy oraıda Premer-Mınıstr qajetti qujattardyń der kezinde daıyndalýy tıistigin basa aıtty.

«Qujattar ýaqtyly daıyndalyp, jospar boıynsha aýyldyq eldi mekenderdi sýmen qamtamasyz etýimiz qajet», - dedi Álıhan Smaıylov.