Álıhan Smaıylov áleýmettik shyǵyndar kólemin aıtty
«2020 jylǵa arnalǵan áleýmettik sala shyǵystary 303 mlrd teńgelik ósimmen 5 trln 692 mlrd teńge kóleminde josparlanyp otyr. Jyl saıynǵy ındeksteýge, zeınetaqy men járdemaqy alýshylardyń sany ulǵaıýyna baılanysty qosymsha 304 mlrd teńge kózdelgen. 2020 jyldan bastap Prezıdenttiń pedagogtardyń mártebesin kóterý jónindegi tapsyrmalaryn iske asyrý boıynsha úsh jylǵa 1,2 trln teńge shyǵystarymen is-sharalar josparlandy. Onyń 749 mlrd teńgesi jergilikti bıýdjetterdiń bazasyna beriledi», - dedi Álıhan Smaıylov Úkimet otyrysynda.
Mınıstrdiń aıtýynsha, budan basqa, 2020 jyldan bastap mindetti áleýmettik medıtsınalyq saqtandyrýǵa tolyq kóshý júzege asyrylatyn bolady.
«Osyǵan baılanysty, atalǵan baǵyt boıynsha shyǵystar 217 mlrd teńgege ulǵaıtyldy. Jalpy alǵanda, shyǵystar qurylymynda áleýmettik salanyń shyǵystary 44,7 paıyzdy quraıdy. 2022 jylǵa qaraı bul kórsetkish 47,6 paıyzǵa deıin ósedi», - dedi ol.