Álıhan Smaıylov 2022 jylǵy el ekonomıkasyn qorytyndylady
«2022 jyldyń qorytyndysy boıynsha el ekonomıkasy qalypty ósý qarqynyn saqtap qaldy. Byltyr ekonomıkanyń naqty ósimi 3,1 paıyzdy qurady. Naqty sektor, onyń ishinde óńdeý ónerkásibi, qurylys jáne aýyl sharýashylyǵy salalaryndaǵy oń kórsetkishter turaqty ósýdiń negizgi faktory boldy. Atap aıtqanda, óńdeý ónerkásibindegi óndiris kólemi 3,4 paıyzǵa ósti. Mashına jasaý salasy - 9,4, onyń ishinde avtomobıl jasaý - 19,1, elektr jabdyqtarynyń óndirisi - 22,2, sýsyndar óndirisi - 11,2, hımııa ónerkásibi - 10,2, jeńil ónerkásip - 6, azyq-túlik óndirisi - 3,9, munaı óńdeý 1,9 paıyz ósim kórsetti», - dedi Úkimet basshysy.
Onyń dereginshe, aýyl sharýashylyǵynda ósý qarqyny joǵary 9 paıyzdan asty. Qurylys salasy da joǵary ósim kórsetip, 9,4 paıyz deńgeıinde ósim qalyptasty.
«2022 jyly elimizde 15,4 mln sharshy metr turǵyn úı paıdalanýǵa berildi. Qyzmet kórsetý sektory 2,5 paıyzǵa ósti. Saýda - 5, kólik - 4, baılanys 8 paıyzǵa ósken», - dedi ol.
Premer-Mınıstr ishki jáne syrtqy ınvestıtsııalardy tartý – ekonomıkalyq ósýdiń mańyzdy faktory ekenin basa aıtty.
«Negizgi kapıtalǵa salynǵan ınvestıtsııalar 7,8 paıyz naqty ósim kórsetti. Bul rette, óndiristiń shıkizattyq emes sektoryna ınvestıtsııa tartý belsendi júrdi. Investıtsııalardyń ósý kórsetkishteri qurylysta, densaýlyq saqtaý, bilim berý, saýda, jyljymaıtyn múlikpen operatsııalarda, aýyl sharýashylyǵy, ónerkásipte, kólik jáne qoımalaý salalarynda joǵary boldy. Barlyq negizgi makrokórsetkishter boıynsha Aqmola, Almaty, Batys Qazaqstan, Jetisý, Qostanaı, Qyzylorda, Pavlodar, Shyǵys Qazaqstan oblystary men Shymkent qalasynda ósim baıqaldy. Al, eń tómen kórsetkish Ulytaý, Mańǵystaý, Atyraý jáne Abaı oblystarynda tirkelip otyr», - dedi Álıhan Smaıylov.
Foto: primeminister.kz