Premer memlekettik qyzmetterdi alý kezindegi halyqtyń shaǵymdaryn atady
«Búgingi tańda memlekettik qyzmetterdiń 92 paıyzy elektrondyq formatta qoljetimdi. Olardyń basym kópshiligin smartfondaǵy qosymshalardyń kómegimen alýǵa bolady. Elektrondyq memlekettik qyzmet kórsetý azamattardyń ómir súrý sapasyn jaqsartýdyń mańyzdy faktory bolyp tabylady. Protsesterdi tsıfrlandyrý memlekettik organdarǵa ótinish berý, anyqtamalar alý sııaqty qaǵazbastylyqty barynsha azaıtýǵa múmkindik berdi. Bul – debıýrokratızatsııa ǵana emes, sonymen qatar azamattardyń ýaqytyn únemdeý», - dedi Úkimet basshysy.
Onyń aıtýynsha, qabyldanǵan sharalar Qazaqstanǵa onlaın qyzmetter kórsetý boıynsha Birikken Ulttar Uıymynyń reıtınginde 8-orynǵa kóterilýge sebepshi boldy.
«Halyqaralyq sarapshylar atap ótkendeı, bul – bizdiń elimizdiń úlken jetistigi. Osy jumystardy belsendi jalǵastyrý qajet. Kórsetiletin qyzmetter servısiniń deńgeıin únemi arttyrý kerek. Bul ásirese, Halyqqa qyzmet kórsetý ortalyqtaryna qatysty. Kórsetiletin qyzmetterdi avtomattandyrý turǵysynan «Azamattarǵa arnalǵan úkimet» memlekettik korporatsııasy oflaın-servıstiń tolyqqandy draıverine aınalýy tıis. Memleket basshysy atap ótkendeı, adamnyń búkil ómirin qamtı otyryp, proaktıvti qyzmet kórsetý qajet. Ol úshin bıznes-protsesterdiń reınjınırıngi júrgizilýde. Qajetti aqparattar derekter bazasynda bolǵan kezde ótinishter men rastaıtyn qujattardy jınaý tájirıbesinen alshaqtaýymyz qajet», - dedi Álıhan Smaıylov.
Premer-Mınıstr reıtıngter men jetistikterdiń joǵary bolǵanyna qaramastan, erekshe nazar aýdarýdy qajet etetin faktorlar bar ekendigin aıtty.
«Máselen, «Elektrondyq úkimet» portalynda bilim týraly qujattardy taný, turǵyn úı kómegin taǵaıyndaý, jer ýchaskesin jaldaý merzimin uzartý sııaqty memlekettik qyzmetterdiń 22 túrin alýǵa áli múmkindik joq. Adamdar málimetter durys emes dep shaǵymdanady. Bıylǵy 10 aıdyń ózinde ǵana málimetterdi túzetýge 56 myńnan astam ótinim túsken. Bul túrli derekqorlardy biriktirip, aqparatty tsıfrlandyrǵan kezde jumystyń sapasy durys bolmaǵanyn kórsetedi. Halyqqa qyzmet kórsetý ortalyqtaryna kelýshiler ondaǵy uzyn-sonar kezekke jáne ǵımarattarda qolaıly jaǵdaılardyń bolmaýyna narazy. Erekshe qajettilikteri bar azamattar arnaıy pandýstar men kótergishterdiń bolmaýyna baılanysty keıbir Halyqqa qyzmet kórsetý ortalyqtaryna kire almaıdy. Biryńǵaı baılanys ortalyǵyna qońyraý shalý óte qıyn», - dedi ol.
Úkimet basshysy lıtsenzııalar men ruqsattar alýǵa ótinish berý kúrdeli bolǵany sonsha, azamattar konsaltıngtik kompanııalar men jeke tulǵalarǵa júginýge májbúr ekendigin aıtty.
«Jalpy atalǵan jaıttar atqarylyp jatqan aýqymdy jumystyń tıimdiligin tómendetip jiberedi. Sondyqtan, azamattardyń shaǵymdary men usynystaryn birden nazarǵa alyp, shuǵyl sharalar qabyldaý qajet», - dedi Álıhan Smaıylov.