Álıhan Smaıylov elimizde ESG standarttaryn engizýdi synǵa aldy
«Qorshaǵan ortany qorǵaý boıynsha ozyq halyqaralyq tájirıbe negizinde ESG standarttaryn engizý qarqyny tómen. Álemniń kóptegen kompanııalary úshin bul standarttar jumystyń ajyramas bóligine aınalǵan. Olar ekologııalyq kórsetkishterdi ǵana emes, áleýmettik, qarjylyq jáne óndiristik kórsetkishterdi de jaqsartýǵa yqpal etedi. Sondaı-aq ESG standarttary - halyqaralyq qarjy ınstıtýttarynyń kredıt berýi kezinde nazarǵa alatyn krıterıılerdiń biri», - dedi Álıhan Smaıylov Úkimet otyrysynda.
Onyń aıtýynsha, tabıǵı resýrstardy únemdeıtin jáne qaldyqsyz tehnologııalardy belsendirek engizý qajet.
«Tabıǵatty qorǵaý sharalaryn jappaı júrgizýdiń mańyzy zor. Kompanııalar aǵash otyrǵyzý, ózen arnalaryn tazartý, orman alqaptary men dalalarda qoqys jınaý naýqandaryn júıeli túrde júrgizýi tıis. Ekologııa jáne tabıǵı resýrstar mınıstrligi men ákimdikter tabıǵat paıdalanýshylarmen birlesip josparly jumys júrgizý kerek. Sonymen qatar ekologııalyq is-sharalardy praktıkalyq turǵydan iske asyrýǵa belgili bir ýaqyt kerek. Árıne, nátıje birden bolmaıdy», - dedi Úkimet basshysy.
Aıta keteıik ESG (environmental, social, governance) - standarttary qorshaǵan ortaǵa jaýapkershilikpen qaraýdy, joǵary áleýmettik jaýapkershilikti jáne korporatıvtik basqarýǵa qoıylatyn sapaly talaptardy qamtıdy.