Álıhan Smaıylov EAEO aıasynda navıgatsııalyq plombalardy bızneske aýyrtpalyq salmaıtyndaı etip engizýge shaqyrdy

<p>QR Premer-Mınıstri Álıhan Smaıylov Qyrǵyzstan astanasy Bishkek qalasynda ótken Eýrazııalyq úkimetaralyq keńestiń keńeıtilgen quramdaǵy otyrysyna qatysty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Úkimet basshysy óz sózinde EAEO 10 jyl ishinde óńirdegi bedeldi ıntegratsııalyq birlestik retinde tanylǵanyn atap ótti.

«Búgingi tańda EAEO – 190 mln-ǵa jýyq halqy, 93 mln-nan astam adamnan turatyn eńbek naryǵy bar jáne JІÓ-si $2,7 trln quraıtyn suranysqa ıe jáne tıimdi yntymaqtastyq formaty. Múshe memleketterdiń ózara saýdasy 2015 jyldan 2022 jylǵa deıin 2 esege ósip, shamamen $85 mlrd-qa jetti. Munyń bári bizdiń birlesken kúsh-jigerimiz ben jemisti jumysymyzdyń, sondaı-aq elder arasyndaǵy joǵary dárejedegi áriptestik qarym-qatynastardyń nátıjesi», — dedi Álıhan Smaıylov.

Premer-Mınıstrdiń aıtýynsha, ıntegratsııalyq birlestikti odan ári damytýdyń ózekti máseleleriniń biri – Orta merzimdi kezeńge arnalǵan deklaratsııa jobasy.

«Bul qujat naqty ekonomıkalyq nátıjesi bar salalardaǵy ıntegratsııalyq úderisterdiń damýyna jańa serpin beretinine senimdimin. Bul rette EAEO-nyń bazalyq qaǵıdattary men maqsattary, atap aıtqanda, onyń ekonomıkalyq baǵyty ıntegratsııanyń myzǵymas negizi bolyp qalýy kerek», — dedi Álıhan Smaıylov.

Úkimet basshysy EAEO-nyń saýda-ekonomıkalyq salany damytýda paıdalanylmaı kelgen zor áleýeti bar ekenine toqtaldy. Alaıda tyń jetistikterge jetý úshin ıntegratsııanyń qazirgi qalyptasqan jaǵdaıyna shynaıy baǵa berý qajet.

«Osy maqsatta bıylǵy mamyr aıynda Qazaqstan Prezıdenti Qasym-Jomart Toqaev qabyldanǵan mindettemelerdiń oryndalýyn baǵalaýdy tapsyrdy. Usynylǵan baıandama jobasyn sapaly deńgeıde pysyqtaý qajet dep sanaımyz», — dedi Úkimet basshysy.

Sonymen qatar Álıhan Smaıylov saýda-sattyqtyń ulǵaıýyna tranzıttik áleýetti tıimdi paıdalaný men damytý yqpal etetinin atap ótti. Máselen, qazirgi ýaqytta EAEO aıasynda taýarlar aınalymyn baqylaýdyń birqatar jańa tetikteri, onyń ishinde navıgatsııalyq plombalar qoldanylyp keledi.

«Múshe memleketterdiń aýmaǵy boıynsha barlyq júk tasymaly baqylanatyn bolady. Bul rette bıznes úshin navıgatsııalyq plombalardy kezeń-kezeńmen jáne barynsha “aýyrtpalyqsyz” engizýge tıispiz. Komıssııaǵa bul jumysty bıznestiń pikirin eskere otyryp júrgizýdi usynamyn», — dedi Premer-Mınıstr.

Oǵan qosa Úkimet basshysy tabysty ekonomıkalyq ıntegratsııanyń basty ólshemi jańa óndirister, tehnologııalar men jumys oryndary ekenin aıtty. Qazirgi ýaqytta komıssııa alańynda dárilik zattar men medıtsınalyq buıymdardyń ortaq naryqtaryn odan ári damytý tujyrymdamasy ázirlenip jatyr.

Qazaqstan osy salalardaǵy yntymaqtastyqtyń kókjıegin densaýlyq saqtaý salasyndaǵy biryńǵaı saıasat arqyly emes, joǵary tehnologııalyq dári-dármekter men medıtsınalyq buıymdardy óndirý úshin jaǵdaı jasaý arqyly odan ári keńeıtýdi usynady.

«Bul turǵyda biz óndiristik qýattardy damytýdy yntalandyryp, sondaı-aq tehnologııalar transferti úshin qolaıly jaǵdaılar jasaýymyz kerek. Komıssııadan tujyrymdamany túzetý kezinde osyny eskerýin suraımyn», — dedi Úkimet basshysy.