Álıhan Bókeıhannyń buryn jarııalanbaǵan jańa fotosy tabyldy (FOTO)

ASTANA. QazAqparat - Omby memlekettik tarıhı-ólketaný murajaıynyń qorynda saqtalyp kelgen Imperatorlyq orys geografııalyq qoǵamy Batys Sibir bóliminiń isinen Alash partııasynyń kósemi Álıhan Nurmuhameduly Bókeıhannyń jańa fotosýreti tabyldy, dep jazady qazaquni.kz ulttyq portaly.

Fotosýretti «Omby ekspedıtsııasy» degen atpen ǵylymı zertteý jumystaryn júrgizgen Qazaqstan ǵalymdary tapqan. Atalǵan ekspedıtsııa ólkentaný murajaıymen qatar, Omby qalasyndaǵy oblystyq memlekettik muraǵat, A.S.Pýshkın atyndaǵy oblystyq kitaphana, oblystyq ónertaný murajaıy syndy mekemelerde ǵylymı izdenis jumystaryn júrgizgen.

Ekspedıtsııa jumysyna tarıh ǵylymdarynyń doktory, «Eýrazııa» gýmanıtarlyq zertteýler ǵylymı ortalyǵynyń dırektory Zııabek Qabyldınov, tarıh ǵylymdarynyń kandıdaty, etnograf Sulýshash Qurmanova jáne L.N.Gýmılev atyndaǵy Eýrazııa ulttyq ýnıversıtetiniń PhD doktoranty, «Alash» mádenıet jáne rýhanı damý ınstıtýtynyń ǵylymı qyzmetkeri Erkin Rahmetýllın, L.N.Gýmılev atyndaǵy EUÝ «Alash» ǴZI dırektory Sultan Han Aqquly atsalysqan. Ǵylymı izdeniske «Aq jol» demokratııalyq partııasy qarjylaı qoldaý kórsetken.

«Arhıvtegi sýret saqtalǵan iste «Pavlodarskaıa tıýrma, 1908 god» degen jazý bolǵan. Sýretke qazaq kósemi - orys sharýalarynyń HІH ǵasyrdyń sońy men HH ǵasyrdyń basyndaǵy tarıhı kezeńge tán kıetin jeıdesin, onyń ústinen jeńil qazaqy shapan, basyna orys shlıapasyn kıip túsken», - dep jazady maqala avtory «Alash» ǴZI dırektory Sultan Han Aqquly.

Maqalanyń tolyq nusqasyn myna jerden oqı alasyz