Álıhan Báımenov: Qazaqstanda 210 myńnan astam adam toǵyzqumalaq oınaıdy

<p>ASTANA. KAZINFORM&nbsp;&mdash; Dúnıejúzilik jáne respýblıkalyq toǵyzqumalaq federatsııasynyń prezıdenti Álıhan Baımenov <a href="https://kaz.inform.kz/" target="_blank" rel="noopener">Kazinform</a> tilshisine toǵyzqumalaq oıynynyń damý barysy jaıynda aıtyp berdi.</p>

Onyń aıtýynsha, toǵyzqumalaq oıyny tek Qazaqstanda ǵana emes, halyqaralyq deńgeıdede qarqyndy damyp keledi.

— El ishinde 210 myńnan astam adam toǵyzqumalaq sektsııasynda turaqty aınalysady. Al osy jarysqa álemniń 41 elinen kelgen oıynshylar qatysýda. Atqarylǵan jumys qatarynda birinshiden álemniń túkpir-túkpirindegi zııatkerlik oıyn janashyrlarymen qarym-qatynas ornatyp jatyrmyz. Ekinshiden, álemge keń tanymal igGameCenter jáne Playok saıtymen baılanys ornattyq. Sonyń arqasynda toǵyzqumalaq osy eki saıtta eń kóp oınalatyn oıyndar qataryna enip otyr, — dedi federatsııa prezıdenti.

Onyń aıtýynsha, 100-den astam eldiń oıynshylary toǵyzqumalaqty onlaın oınaıdy.

— IP adresin tekserip kórgende, 100-den astam eldiń azamaty toǵyzqumalaq oınaıtyny belgili boldy. Sonymen birge buqaralyq sıpatta nasıhattaý úshin 2028 bala bir mezette toǵyzqumalaq oınap, Gınnes rekordyn jasadyq. Al jaqynda 213 myń adam oıyndy onlaın rejımde oınasa, kúni keshe ǵana toǵyzqumalaqtyń taqtasy alǵash ret stratosfera qabatyna kóterildi, — deıdi ol.

Báımenov toǵyzqumalaq sportyn nasıhattaý úshin jan-jaqty jumys atqarylyp jatqanyn aıtty.

— Bul rette biz Týrızm jáne sport mınıstrligimen, tıisti komıtetpen jáne qala-aýdan ákimderimen, sonymen qatar ulttyq oıynymyzdyń janashyr kásipkelerimen tyǵyz áriptestik ornatyp, keń aýqymda jumys jasap jatyrmyz, — dedi federatsııa basshysy.

Sóz sońynda Álıhan Baımenov BAQ ókilderine alǵys aıtty.

— Osy sátti paıdalana otyryp, qazaqstandyq buqaralyq aqparat quraldaryna shyn júrekten rahmetimdi aıtqym keledi. Sizder toǵyzqumalaqty nasıhattaý, dáripteý isinde úlken úles qosyp júrsizder, — dedi Báımenov.

Aıta keteıik, V Dúnıejúzilik kóshpendiler oıyndarynyń toǵyzqumalaq básekesi Astana qalasyndaǵy «Dýman» qonaq úıinde ótip jatyr.