Álıhan Báımen jer qoınaýyn paıdalanýshylarǵa beriletin jeńildikterge revızııa jasaýdy usyndy
«Adamı kapıtal damýynda ekonomıkalyq saıasattyń orny erekshe. Memleket basshysynyń monopolııadan arylýǵa baǵyttalǵan batyl sheshimderi qoǵamdyq psıhologııaǵa da áser etip, alpaýyt olıgarhtar eldiń ıesi – ult bar ekenin seze bastaǵandaı» - dedi ol Ulytaýdaǵy Ulttyq quryltaıdyń alǵashqy otyrysynda.
Sondaı-aq ol referendým arqyly jer men jer qoınaýynyń ıesi halyq ekeni bekitilgenin eske saldy.
«Endi jer qoınaýyn paıdalaný kontraktileri jarııa bolýyn mindetteıtin zańdar qajet. Ekinshiden, Úkimet osy kúnge deıin berilip kelgen salyqtyq, kedendik, basqa jeńildikterge revızııa jasap, arnaıy komıssııa qaıta sheshim qabyldaǵansha olardyń berilýin toqtata turý durys dep esepteımin», - dedi Álıhan Báımen..
Aıta keteıik, Prezıdent Ulytaý oblysyndaǵy jumys sapary aıasynda Ulttyq quryltaıdyń alǵashqy otyrysyna qatysyp jatyr.
Keshe Memleket basshysynyń Ulttyq quryltaı qurý týraly Jarlyǵy jarııalandy.
Ulttyq quryltaıdyń qazirgi quramynda Májilis depýtattary men QHA múshelerinen, azamattyq qoǵam men saıası partııa ókilderinen, sarapshylar men óńirlerdegi qoǵamdyq keńes múshelerinen, kásipkerlerden jasaqtalǵan 117 adam bar.
Solardyń bir parasyn atasaq, aqyn Muhtar Shahanov, qazaqtyń tuńǵysh ǵaryshkeri Toqtar Áýbákirov, akademık Asqar Jumadildaev, ekonomıst Jaqsybek Kúlekeev, saıasatker Álıhan Báımenov, jýrnalıst, medıa-menedjer, qoǵam qaıratkeri Ermurat Bápı, Parlamenttiń birneshe shaqyrylymynyń depýtaty Nurtaı Sabılıanov, balýan Dáýlet Turlyhanov, ǵalym-bıotehnolog Kúnsulý Zakarııa, dintanýshy Qaırat Joldybaı, ǵalym Anar Fazyljanova sııaqty esimder bar.
Memlekettik keńesshi Erlan Qarınniń jazbasyna súıensek, keleshekte quryltaı jumysyna qatysýshylar aýystyrylyp otyrýy múmkin.