Álibek Náýtıev Atyraý oblysynyń jurtshylyǵymen kezdesti

ASTANA. QazAqparat – Parlament Senatynyń depýtaty Álibek Náýtıev Atyraý oblysynda boldy. Senator sapar barysynda Atyraý oblystyq máslıhatynyń depýtattarymen kezdesti jáne ekologııa men áleýmettik jaǵdaı, bıýdjettik alymdar men ınfraqurylym jáne turǵyn úımen qamtamasyz etý máselelerin talqylady, dep habarlaıdy QazAqparat Senattyń baspasóz qyzmetine silteme jasap.

Senator sondaı-aq Atyraý oblystyq tótenshe jaǵdaılar, ekologııa departamentteriniń, sondaı-aq ekologııa, aýyl sharýashylyǵy basqarmalarynyń jáne «Qazsýshar» RMK basshysymen kezdesti. Onda tótenshe jaǵdaılardyń aldyn alý, sýmen jabdyqtaý jáne Azǵyr jáne Taısoıǵan polıgondarynyń tóńiregindegi jaǵdaılar talqylandy.

Depýtat sonymen qatar Atyraý oblysy Qoǵamdyq keńesiniń múshelerimen de kezdesti. Shara barysynda óńirdegi problemalyq máseleler, onyń ishinde kópbalaly otbasylardy turǵyn úımen qamtamasyz etý, aýyl sharýashylyǵy, bilim sapasy, medıtsınalyq qamtamasyz etý sharttary egjeı-tegjeıli talqylandy.