Álibek Qýantyrov ınflıatsııa týraly: Qazir jaǵdaı kúrdeli

NUR-SULTAN. QazAqparat – QR Ulttyq ekonomıka mınıstri Álibek Qýantyrov Úkimet otyrysynan keıin BAQ ókilderine bergen suhbatynda Ýkraınadaǵy jaǵdaıdyń Qazaqstandaǵy ınflıatsııaǵa áserin báseńdetý úshin qandaı sharalar qolǵa alynǵanyn aıtty, dep habarlaıdy QazAqparat tilshisi.

«Qazir ınflıatsııaǵa qysym bolyp jatyr. Onyń áseri qandaı bolatynyn naqty aıtý qıyn. Kishkene shydaı turý kerek. Sebebi Ýkrınadaǵy jaǵdaı barynsha tez turaqtansa, bizdegi baǵaǵa áseri tómen bolady. Biraq ony áli qadaǵalaý kerek.

Úkimet Ulttyq bankpen birge daǵdarysqa qarsy tıisti keshendi jospar qabyldady. Sol jospar shuǵyl túrde oryndalyp jatyr. Negatıvti, bazalyq jáne optımıstik deıtin úsh stsenarıi bar. Árıne, qazir jaǵdaı kúrdeli. Biraq buǵan deıin aıtqanymdaı, naqty áserdi baǵalaý úshin kishkene ýaqyt kerek», - dedi mınıstr.

Onyń aıtýynsha, Ýkraınadaǵy jaǵdaı ýshyqqan jaǵdaıda da barlyq áleýmettik mindettemeler iske asyrylady.

«Sebebi Úkimette oǵan qajet qarajat ta, múmkindik te bar», - dedi vedomstvo basshysy.