Áli kúnge deıin koronavırýsqa senbeıtin qazaqstandyqtar bar – mınıstrlik

NUR-SULTAN. QazAqparat – Qazaqstanda áli kúnge deıin koronavırýstyń baryna senbeıtin azamattar bar. Sondaı-aq, olar vaktsınaǵa da senbeıdi eken. Bul týraly QR Densaýlyq saqtaý mınıstrligi sanıtarlyq-epıdemıologııalyq baqylaý komıtetiniń resmı ókili Erjan Baıtanaev málim etti, dep habarlaıdy QazAqparat tilshisi.

«Vırýsty jeńýdiń jalǵyz joly vaktsına ekenin adamdarǵa tolyqtaı jetkizý múmkin bolmaı otyr. Keıbir adamdar medıtsınanyń qudyretin janyna dert batqanda nemese jaqynynan aırylǵan kezde ǵana túsinip jatady. Ókinishke qaraı, áli kúnge deıin koronavırýsqa senbeıtin qazaqstandyqtar bar. Vırýspen 3-shi jyl kúresip kelemiz. Senbegenimen qoımaı, COVID-19-dy sizder oılap taptyńyzdar ǵoı dep suraıtyn jandar bar. Bul jerde feık aqparattardyń taralýy keri áserin tıgizip jatyr. Jalǵan aqparattarǵa qatysty kúnine birneshe túsinik berip, resmı aqparata súıený kerektigi týraly aıtyp jatyrmyz. Degenmen kelesi kúni basqa bir feık shyǵyp jatady», - dedi Erjan Baıtanaev « Habar « telearnasyna bergen suhbaty barysynda.

Onyń aıtýynsha, qazir álemde vaktsınaǵa suranys joǵary. Jáne ony elge jetkizý memlekettik deńgeıdegi kelissóz ben birneshe ret kezdesýdiń nátıjesinde júzege asyp jatyr.

«Sondyqtan múmkindikti paıdalanyp tegin vaktsınany alý kerek. Onyń ústine bizdiń vaktsınanyń birneshe túri bar. ıAǵnı adamdarda tańdaý bar. Qazaqstanǵa syrttan ákelinetin ár vaktsına zerthanalyq tekseris pen baqylaýdan ótedi. Sodan soń ekpeni el aýmaǵynda resmı tirkeýden ótkizedi. Vaktsınaǵa qatysty taǵy bir mańyzdy jaıt Qazaqstanda vaktsına alyp, qaıtys boldy degen jaıt tirkelgen emes», - deıdi ol.