Álı Bektaev: Saýran aýdanynan sý qoımasyn salý kerek

ASTANA. QazAqparat – Túrkistan oblysynda sýarmaly jerlerdi kútip ustaý máselesi búginde mańyzdy bolyp tur. Senator Álı Bektaev Premer-Mınıstr Álıhan Smaıylovtyń atyna depýtattyq saýalynda óńirdegi problemalardy kóterdi, dep habarlaıdy QazAqparat tilshisi.

Senatordyń aıtýynsha, oblystyń Shardara, Arys jáne Otyrar aýdandarynda 440 myńnan astam adam turady. Olardyń kópshiligi eginshilik salasynda jumys isteıdi. Sonymen qatar, 74 myń gektar aýyl sharýashylyǵy jerlerin sýarý úshin olar sýdy Shardara sý qoımasynan 1970 jyldary salynǵan Qyzylqum magıstraldy kanaly arqyly alady.

«Osy sý qoımalarynan taraıtyn kanaldar men sý júıeleriniń jaǵdaıy óte nashar. Jarty ǵasyrǵa jýyq úzdiksiz qyzmet etip kele jatqan Qyzylqum magıstraldy kanalynyń paıdaly áseriniń koeffıtsıenti 0,60-ty ǵana quraıdy. Jyl saıyn sý qoımasynan alynatyn 950-980 mln tekshe metr sýdyń, tek 620-630 mln tek metri ǵana egis alqaptaryna jetedi», - dedi Á. Bektaev Senattyń jalpy otyrysynda.

Sonymen qatar depýtat jer asty sýlarynyń kóterilýine jol bermeý jáne topyraqty qalypty jaǵdaıda ustaý úshin aımaqta buryn salynǵan 302 tik drenaj isten shyqqanyn nemese múldem joǵalyp ketkenin aıtty. Arys-Túrkistan kanaly boıyndaǵy aýyl sharýashylyǵy alqaptarynyń jaǵdaıy da Bógen sý qoımasyndaǵy sý kóleminiń tómendeýine baılanysty qanaǵattanarlyqsyz jaǵdaıda. Atap aıtqanda, Saýran aýdanynyń Shaǵa, Qarashyq, Shornaq aýyldarynda fermerlerge qajet sý berý tamyz aıynda tolyǵymen toqtatyldy.

«Óńirdiń barlyq magıstraldy kanaldary men sýǵarý júıeleriniń barlyǵyn tolyq zerttep, olardy qalpyna keltirý, sý aǵý múmkindikterin arttyrý, sý shyǵynyn tómendetý baǵytynda naqty jol kartasyn jasap, aldaǵy 2-3 jyldyń kóleminde kúrdeli jóndeýden ótkizýdiń múmkindigin qarastyrý kerek. Saýran aýdanyndaǵy aýyl sharýashylyǵy jerlerin sýlandyrýdy jaqsartý maqsatynda syıymdylyǵy 3,2 mln tekshe metr sý qoımasyn salýdy usynamyz», - dedi senator.