Álı Ahmedov Irlandııada kezekti jekpe-jegin ótkizedi

<p>ASTANA. KAZINFORM &ndash; Sýper orta salmaqtaǵy qazaqstandyq boksshy Álı Ahmedov (21-1,16KO) búgin Irlandııada kezekti jekpe-jegin ótkizedi.</p>

BoxRec portalyndaǵy aqparatqa sáıkes, otandasymyz frantsııalyq boksshy Per Hýbert Dıbombemen (22-1-1,12KO) qolǵap túıistiredi, jekpe-jek 10 raýndqa josparlanǵan.

Aıta keteıik, boks keshi Irlandııanyń Dýblnı qalasyndaǵy 3Arena kesheninde ótedi. Basty jekpe-jekte jergilikti boksshy Kallým Ýolsh polshalyq Pshemyslav Rýnovskıımen judyryqtasyp, WBC Continental Americas Super Welter beldigin sarapqa salady.

Boks keshi Gennadıı Golovkınniń promoýteri Tom Lefflerdiń «360 Promotions» promoýterlik kompanııasynyń uıymdastyrýymen ótedi.

Eske sala ketıik, bul Álı Ahmedovtyń osy jyldaǵy úshinshi jekpe-jegi. Ol buǵan deıin Karlos Rıvero jáne Enkarnatsıon Dıasty merziminen buryn jeńgen bolatyn.

Osyǵan deıin Boks federatsııasy jańadan jasaqtalǵan bapkerler quramyn jarııalaǵanyn jazdyq.