Alǵys aıtý kúni Shymkentte bir apta boıy atalyp ótiledi

ShYMKENT. QazAqparat - Bıyl 1 naýryz - Alǵys aıtý kúni Shymkent qalasynda ózindik ereksheligimen atalyp ótedi. Jańa mazmunda ótkiziletin merekelik sharalar 22 aqpannan bastalyp 1 naýryzǵa deıin apta boıy jalǵasady. Bul týraly búgin Shymkenttegi «Qazaqstan halqy Assambleıasy» ǵımaratynda ótken brıfıngte qalalyq QHA tóraǵasynyń orynbasary Muratáli Qalmuratov málim etti, dep habarlaıdy QazAqparat tilshisi.

Sharany uıymdastyrýshylardyń sózinshe, eldi birlikke úndeıtin merekeniń túpki máni - kezinde túrli sebeptermen qazaq jerine qonys aýdarǵan etnos ókilderiniń memleket quraýshy ultqa alǵys aıtýyn kózdeıdi. Aptalyq merekeni jer-jerlerde uıymdastyrý men ótkizýdiń tujyrymdamasy ázirlenip, ár kúnge arnaıy ataýlar berilgen.

Máselen, 22 aqpan - Qaıyrymdylyq kúni bolsa, 23 aqpan - Tazalyq kúni retinde ótedi. 24 aqpan - Kórshige izet kúni, 25 aqpan - Ustazǵa qurmet kúni, 26 aqpan - Tarıhqa taǵzym kúni, 27 aqpan - Yqylas kúni, 28 aqpan - Urpaqtar sabaqtastyǵy kúni, 1 naýryz - Alǵys aıtý kúni bolmaq.

«Aptalyq ish-sharalar búgin «Qaıyrymdylyq kúnimen» bastaý aldy. Qazaqstan halqy Assambleıasynyń Qaıyrymdylyq kerýeni sheńberinde «Sybaǵa» is-sharasy ótkizildi. Qalalyq assambleıa men túrik etnomádenı birlestigi iri qarany qurbandyqqa shalyp, eti ulttyq dúnıetanymymyzǵa sáıkes jeti túrli azyq-túlikpen tolyqtyrylyp qadirli qarııalarǵa, abzal analarymyzǵa, jas otaý ıelerine barlyǵy 40-tan astam otbasyǵa sybaǵa retinde úlestirildi. 23 aqpan - Tazalyq kúni retinde belgilense, 24 aqpan - «Kórshige izet kúni» kúninde ótetin is-sharalar eldi berekeli birlik pen yrysty yntymaqqa jetelep, kórshiler arasynda ózara túsinistik pen qurmetti qalyptastyrýdy kózdeıdi»,- deıdi Muratáli Qalmuratov.

Bul kúni sondaı-aq, Saıramdaǵy ózbek etnosynyń beldi azamattary kórshiles Shapyrashty, Ótemis, Qyzylsý, Tassaı, Mártóbe, Toǵys, Badam, Qarabastaý turǵyn alaptarynyń abzal qarııalaryn, abyroıly azamattaryn syıly qonaq retinde shaqyryp, izetin kórsetpek.

Foto: shymkent.gov.kz