Alǵys aıtý kúni: Oralda az qamtylǵan 100 otbasyna azyq-túlik sebeti jetkizildi
Oral qalasyndaǵy is-sharalar oblys ákiminiń orynbasary Baqytjan Narymbetovtiń qatysýymen «Qazaq halqyna myń alǵys» monýmentine gúl shoǵyn qoıý rásiminen bastaldy.
Munda jınalǵandar Qazaqstan jerine taǵdyr aıdaýymen kelgen túrli ulttardyń qazaq halqynan qamqorlyq kórgenin, muny olardyń eshqashan umytpaıtyndyǵyn atap ótti.
Dostyq úıinde «Qaıyrymdylyq kerýeni» aktsııasy uıymdastyrylyp, shahardaǵy az qamtylǵan 100 otbasyǵa áleýmettik azyq-túlik sebetteri jetkizildi.
Buǵan BQO Qazaqstan halqy assambleıasy, etnomádenı birlestikter, jastar men volonterlik uıymdar, quqyq qorǵaý organdary, basqa da janashyr azamattar qatysty.
Merekelik is-sharalar Dostyq úıinde «Qazaqstan – baqyt mekeni» atty kontserttik baǵdarlamamen qorytyndylandy.
«Alǵys aıtý kúnine oraı jer betinde ómir súrip jatqan adamdardyń bárine alǵys aıtqym keledi. Bul kúni sońǵy eki jyl boıy pandemııamen kúreste aldyńǵy shepte júrgen dárigerler qurmetke laıyq. Bizdiń tynyshtyǵymyzdy kúzetetin tártip saqshylaryna, sol sekildi adamdardy ottan, sýdan qutqarýǵa asyǵatyn TJ qyzmetkerlerine rızashylyǵymyz sheksiz. Yntymaq pen birlik jolynda aıanbaı eńbek etip júrgen etnomádenı birlestikter basshylaryna rahmet aıtamyn. Búgin qaıyrymdylyq kerýeni kezinde de polıtsııa, TJ departamentteriniń qyzmetkerleri belsendilik kórsetti», dedi BQO Qazaqstan halqy assambleıasynyń bólim basshysy Inessa Toboleva.