Alǵys aıtý kúni - kıeli qazaq jerine degen rızashylyqtyń belgisi - Elbasy
Kontsert aldynda «Qymyzdan qýat alǵan birtutas el» atty biregeı kórme uıymdastyryldy. Sonymen qatar kópshilik nazaryna Botaı mádenıetiniń ekspozıtsııalary usynyldy. Kórme barysynda jıynǵa kelgender ónimdi uzaq saqtaýǵa arnalǵan ydystarǵa quıylǵan qymyzdyń dámin tatty. Bul ónimderdi Almaty, Jambyl, Qaraǵandy, Pavlodar oblystarynyń taýar óndirýshileri tanystyrdy.
Sonymen qatar kontsert aldynda QR Aqparat jáne qoǵamdyq damý mınıstri Dáýren Abaev Memleket basshysy Nursultan Nazarbaevtyń Alǵys aıtý kúnine oraı quttyqtaý hatyn oqyp berdi.
«Qurmetti otandastar! Búgin biz erekshe mereke - Alǵys aıtý kúnin atap ótýdemiz. Bul halqymyzdyń qıyn-qystaý zamanda tanytqan meırimdiliginiń eshqashan umytylmaıtynyn bildiredi. Alǵys aıtý kúni - bizdiń ortaq tarıhymyzǵa bildirgen qurmet, barsha qazaqstandyqtardyń óz úıine aınalǵan kıeli qazaq jerine degen rızashylyǵy», - dep atap ótilgen Elbasy quttyqtaýynda.
Osy oraıda Prezıdent Táýelsizdik jyldarynda Qazaqstan halqynyń birligin nyǵaıta otyryp, elimizdiń aıryqsha tatýlyq pen kelisim modeli qalyptasqanyn jetkizdi.
«Qazirgi kezde biz aýqymdy jańǵyrtý baǵdarlamasyn iske asyrýdamyz, halyqtyń ál-aýqatyn arttyrý jóninde keshendi sharalar qabyldaýdamyz. Yntymaqtastyq pen ózara kómek sııaqty eshqashan joıylmaıtyn adamı qundylyqtar árqashan bizderdi biriktirip, oıymyzǵa elimizdiń ortaq bolashaǵyna qatystylyq pen jaýapkershilik sezimin qalyptastyrady. Qazaqstandyqtardyń qazirgi býyny, ásirese jastar, dana tarıhymyzdy bilýi jáne este saqtaýy kerek. Tarıhtyń taǵylymy men dana sabaqtary shynaıy patrıotızm men birliktiń úlgisin kórsetedi. Árqaısymyzdyń júregimizdi bizdiń ortaq jetistigimiz - órkendeýshi Qazaqstan úshin maqtanysh pen rızashylyq sezimi kerneı bersin! Barshańyzdy osy tamasha merekemen shyn júrekten quttyqtaımyn! Ár qazaqstandyq otbasyna baqyt men qut-bereke, tatýlyq pen órkendeý tileımin!», - delingen Memleket basshysynyń quttyqtaý hatynda.
Aıta keteıik, Alǵys aıtý kúnin merekeleý aıasynda elimizde 1 570-ke jýyq túrli mádenı-kópshilik jáne qaıyrymdylyq is-sharalary ótedi.
Qazaqstan halqy Assambleıasynyń málimetine qaraǵanda, osy sharalarmen 3,5 myń eldi meken qamtyldy. Osy oraıda muqtaj jandarǵa, kópbalaly analarǵa, jetimderge 126 mln teńgege kómek kórsetiledi.