Alǵys aıtý kúni – qazaq halqyna erekshe qurmettiń belgisi - Vakıl Nabıev

NUR-SULTAN. QazAqparat – Alǵys aıtý kúni – ol qazaq halqyna syı-qurmettiń nyshany. Bul týaly QR Parlament Májilisiniń depýtaty Vakıl Nabıev málim etti, dep habarlaıdy QazAqparat tilshisi.

«Kóktemniń alǵashqy kúninde maǵynasy tereń Alǵys aıtý kúnin atap ótemiz. Bul merekelik datany Elbasy Nursultan Nazarbaev Qazaqstan halqy Assambleıasy qurylǵan kúndi negizge alyp bastamashylyq etti. Bul turǵyda barsha etnostar bir-birine jáne qazaq halqyna alǵys aıtady. Qazaq halqy óziniń meırimdiligimen ózge ult ókilderin jaqynyndaı qabyldaǵanyn barlyǵy umytpaıdy. Sondyqtan atalǵan mereke Qazaqstan halqy meırimdiliginiń, dostyqtyń ári baýyrmaldyqtyń aıqyn kórinisi. Elge tutas etnostar jer aýdarylǵanyn, olardy vagondardan jazyq dalaǵa túsirip ketkenin bárimiz bilemiz. Al onsyz da qıyn jaǵdaıdaǵy qazaq otbasylar sol kezde jer aýdarylǵandardy úılerine kirgizip, barynsha qoldaý jasap keldi. Atalarymyz sol náýbet jyldardaǵy barlyq aýyrtpalyqtardy jıi eske alatyn», - dedi V. Nabıev.

Osy oraıda depýtat Alǵys aıtý kúnin atap ótý maqsattarynyń biri óskeleń urpaqty tózimdilikke, syılastyqqa, sondaı-aq eldegi beıbitshilik pen kelisimge tárbıeleýge baǵyttalǵanyn atap ótti. Sondyqtan bul datanyń tereń maǵynalyq máni bar.

«Alǵys aıtý kúni – ol óz elińe, jerińe, qazaq halqyna erekshe qurmettiń belgisi. Osy mereke etnostar basynan ótkergen aýyrtpalyqty, birligimizdi jastarǵa túsindirýge yqpal etedi», - dedi V.Nabıev.

Onyń aıtýynsha, Alǵys aıtý kúni qarsańynda QHA-nyń «Jańǵyrý joly» jastar qozǵalysy, «Jarasym» uıymy, etnomádenı birlestikter jastary merekelik is-sharalardy ótkizýge belsendi túrde qatysady.