Alǵys aıtý kúni: Aqmola oblysynda 1000-nan astam túrli is-shara ótkizildi
Sharada aımaq basshysy Ermek Marjyqpaev aqmolalyqtardy osynaý merekemen quttyqtap, bul kúnniń barlyq qazaqstandyqtar úshin tarıhı mańyzdylyǵyna toqtaldy.
«Tarıhymyzdyń kóptegen betteri joǵary moraldyq qundylyqtardyń biri retinde rızashylyqpen baılanysty. Saıası qýǵyn-súrgin men jer aýdarýdyń qasiretti jyldarynda adamdarǵa qoldaý kórsetkeni úshin bir-birine alǵys bildirý úmitin qaıta tabýǵa, ómirin qaıta bastaýǵa múmkindik berdi. Búginde qýǵyn - súrgin dáýirinen aman qalǵan kýágerler men urpaqtar qasıetti qazaq jerinde alǵan qamqorlyq pen qonaqjaılylyqty zor yqylaspen eske alady», - dep atap ótti aımaq basshysy.
Іs-sharaǵa qatysýshylarǵa eńbek ardageri, Kókshetaý qalasynyń Qurmetti azamaty Bolat Janádilov, kóp balaly ana Mına Jeksembaeva, etnomádenı birlestikterdiń ókilderi jáne basqalar alǵys sózderin aıtty.
«Búgin biz erkin elde turamyz, búkil álem biz úshin ashyq. Biz qazaqtarmen, káristermen, nemistermen, ıngýshtarmen jáne basqa da etnostarmen qatar ómir súrip, balalarymyzdyń bolashaǵyn birge quramyz. Bul kúni oblys turǵyndaryna, Elbasymyz ben Prezıdentimizge Qazaqstandaǵy beıbitshilik pen kelisim úshin alǵysymdy bildirgim keledi», - dep atap ótti oblys polıaktary birlestiginiń múshesi Pavel Trış.
Іs-shara barysynda birqatar aqmolalyqtar «Halyq alǵysy» medalimen, birlik pen kelisimdi, qazaqstandyq biregeılikti nyǵaıtqany, izgiliktiń gýmanıstik murattaryna joǵary qyzmet etkeni úshin oblys ákiminiń Alǵys hattarymen marapattaldy.
Alǵys aıtý kúni Kókshetaý qalasynyń «Býrabaı» sport saraıy, trıatlon mektebi, Qajymuqan atyndaǵy sport kesheni jáne «Oqjetpes» fýtbol klýby medıtsına qyzmetkerleri úshin Ashyq esik kúnin jarııalady. Dárigerler men medıtsına qyzmetkerleri atalǵan uıymdardyń sport sektsııalaryna tegin bara alady.
Óńirde Alǵys aıtý kúnine oraı 1 myńnan astam túrli is-shara ótkizildi. Olardyń qatarynda eriktilerdiń, jastardyń, kásipkerlerdiń jáne turǵyndardyń qatysýymen «Qaıyrymdylyq kerýeni: 30 ıgi is» qaıyrymdylyq marafony aıasynda ótip jatqan halyqtyń áleýmettik osal toptaryna kómek kórsetý boıynsha aktsııalar, kontsertter, kórmeler, chellendjder bar.