Alǵashqy medıtsınalyq kómek týraly konferentsııaǵa 100 elden delegatsııa keledi
Kezdesýge Densaýlyq saqtaý mınıstri Ajar Ǵınııat, DDU Eýropalyq óńirlik bıýrosynyń dırektory Hans Klıýge, Eýropalyq óńirdiń 12 elinen kelgen turaqty komıtettiń músheleri, DDU sarapshylary qatysty.
Óńirlik komıtettiń turaqty komıteti (ÓKTK) – óńirlik dırektorǵa keńes beretin, EýroDDU qyzmetiniń ary qaraıǵy damý saıasaty men negizgi baǵyttaryn aıqyndaıtyn Eýropa óńiri deńgeıindegi DDU-nyń basqarýshy organdarynyń biri.
Densaýlyq saqtaý mınıstri Ajar Ǵınııat óz sózinde Qazaqstanda dúnıejúzilik uıymnyń Eýropa óńirlik komıtetiniń turaqty komıtetiniń otyrysy alǵash ret ótip jatqanyn atap ótti.
«Bul komıtet eýropalyq deńgeıde densaýlyq saqtaýdyń mańyzdy baǵyttaryn, ózekti máseleleri men aldaǵy maqsattaryn talqylaıdy. Medıtsına salasyndaǵy álemdik sarapshylar eki kún boıy bizdiń elimizde densaýlyq saqtaý salasyn ary qaraıǵy damytý joldaryn sóz etedi. DDU Eýropalyq óńirlik bıýrosynyń, densaýlyq saqtaý salasyndaǵy mamandar men sarapshylardyń bizdiń elge kelýi – úlken jetistik», - dedi mınıstr.
Qazaqstan 2020 jyldan bastap Eýropalyq óńirlik turaqty komıtettiń múshesi bolyp tabylady.
Sodan beri komıtet jumysyna belsendi qatysyp keledi. Ótken jyldyń qyrkúıek aıynan bastap Qazaqstan - óńirlik komıtettiń turaqty komıtetiniń tóraǵasy.
Bul elimiz úshin úlken mártebe bolyp tabylady jáne Qazaqstan men DDU arasyndaǵy yntymaqtastyqtyń joǵary deńgeıin kórsetedi.
Ajar Ǵınııat bıyl Astanada 23 qazanda Medıtsınalyq-sanıtarııalyq alǵashqy kómek boıynsha Almaty deklaratsııasynyń qabyldanǵanyna 45 jyl, Astana deklaratsııasynyń qabyldanǵanyna bes jyl tolýyna oraı halyqaralyq konferentsııa ótetinin atap ótti. Konferentsııaǵa 100 – den astam eldiń, halyqaralyq uıymdardyń ókilderi, densaýlyq saqtaý salasynyń mamandar oflaın jáne onlaın rejıminde qatysady.
Budan bólek, 24-26 qazanda Astanada DDU Eýropalyq óńirlik komıtetiniń 73 sessııasy ótedi.
Oǵan jahandyq densaýlyq saqtaýdyń ózekti máselelerin, onyń ishinde densaýlyq saqtaý qyzmetimen jalpy qamtamasyz etý, tótenshe jaǵdaı kezinde qorǵaý, densaýlyq pen ál-aýqat deńgeıin arttyrý, sondaı-aq, DDU-nyń ár eldi qoldaýdyń tıimdiligin arttyrý maqsatynda DDU Eýropalyq óńirine múshe 53 memlekettiń ókilderi qatysady.
«Densaýlyq saqtaý salasyndaǵy bul is – sharalar búkil álemge tanylyp qana qoımaı, saıası jaǵynan da, Qazaqstannyń ımıdjin arttyrý jaǵynan da úlken jetistik bolady», - dedi Ajar Ǵınııat.
Óz kezeginde DDU Eýropalyq óńirlik bıýrosynyń basshysy Hans Klıýge mańyzdy is-sharalardyń nelikten Qazaqstanda ótetinine toqtaldy.
«Qazaqstan 1978 jyldan beri alǵashqy medıtsınalyq-sanıtarlyq kómektiń otany sanalady. Qazaqstanda Memleket basshysynyń, Úkimet jáne Densaýlyq saqtaý mınıstrliginiń qoldaýymen reformalar júzege asyp jatyr. Bul el MSAK salasynda kóshbasshy sanalady. Sondyqtan bul elden kóp nárse úırenýge bolady. Mysaly, Qazaqstan medıtsına jáne áleýmettik qyzmetkerlerdiń, psıhologtardyń jumysyn MSAK-qa biriktirgen alǵashqy el boldy. Bul sapaly qyzmetterdi kórsetýge múmkindik beredi», - dedi Hans Klıýge.
Eske salaıyq, buǵan deıin Densaýlyq saqtaý mınıstri Ajar Ǵınııat Medıtsınalyq-sanıtarııalyq alǵashqy kómek sektoryndaǵy problemalardy aıtqan edi.