Alǵashqy ózbek kompıýterlik oıyny jarııalandy

<p>Ózbekstannyń Doomers Entertainment stýdııasy &laquo;Altyn Orda&raquo; dep atalatyn aýqymdy kompıýterlik oıyndy ázirledi. Stýdııanyń bul alǵashqy oıynyndaǵy oqıǵalar XIII ǵasyrǵa jatady jáne Ortalyq Azııada oryn alady, dep habarlaıdy Kazinform UzA-ǵa silteme jasap.</p>

Onda oıynshy mońǵol otbasylarynda bolatyn kórinisterge qatysady. Oıyn kartasynyń kólemi 76 sharshy shaqyrymdy quraıdy, bul aty ańyzǵa aınalǵan The Elder Scrolls V: Skyrim oıynynan derlik eki ese úlken.

«XIII ǵasyr ortasynda Ulys bıligi tóńireginde jaǵdaı shıelenise túsedi. Qomaǵaı, dúnıeparaz bıleýshi Esý-Mýnke bılikti qaraýsyz qaldyrady. Onyń ornyna áıeli men mınıstri úkimetti basqarady. Ulysta mońǵoldyń eki uly taıpasy bılikke umtylady. Baı-aýqattylar odaqtastarymen birigip, qastandyqtar uıymdastyrady. El arasynda daý týyndap, ekige bólinedi».

Oıynnyń sıýjeti osy jerden bastalady.

Jaqynda Doomers Entertainment stýdııasy zamanaýı Unreal Engine 5 baǵdarlamalyq jasaqtamasyna aýysqanyn habarlady. Jobany VK «The Golden Horde | Ekshn RPG | Orta ǵasyr» áleýmettik jelisinen qaraýǵa bolady. Oıyn áli Steam onlaın dúkenderine shyǵarylmaǵan.