Alǵash ret ushaq bortynda búldirshinniń tusaýy kesildi
22:08, 13 Qyrkúıek 2023
Alǵash ret otandyq avıatasymaldaýshynyń bortynda tusaý kesý rásimi ótkizildi, dep habarlaıdy QazAqparat.
Búgin avıatsııa tarıhynda alǵash ret QAZAQ AIR áýe kompanııasynyń bortynda bala ómirindegi jańa kezeńniń bastalǵanyn kórsetetin tusaý keser ulttyq rásimi ótkizildi.
Áýeli bortserik atalǵan reıs jolaýshylaryna búgin tarıhı oqıǵaǵa kýá bolatynyn habarlady.
Tańǵy reıstegi jolaýshylardy kútpegen habarlandyrý tań qaldyrdy.
7600 metr bıiktikte QAZAQ AIR áýe kompanııasynyń kapıtany Ánýarbek Ernazarov kishkentaı jolaýshy Aılanaǵa jarqyn bolashaq pen baqytty ómir jolyn tileı otyryp, tusaýyn kesti.
Qysqa rásim aıaqtalǵannan keıin shashý shashylyp, jolaýshylarǵa baýyrsaq taratyldy.
Atalǵan shara avıatsııalyq qaýipsizdik erejelerine sáıkes ótkizildi jáne is-sharaǵa qatysqan komandır osy reıstiń jolaýshysy bolatyn.