Alǵash ret múgedek arbasyndaǵy tennısten el kýbogi ótedi

ASTANA. QazAqparat – Almaty qalasynda 17-19 naýryzda alǵash ret múgedek arbasyndaǵy tennısten Qazaqstan kýbogi jarysy ótedi, dep habarlaıdy QazAqparat tilshisi.

Qazaqstan tennıs federatsııasynan málim etkenindeı, týrnırge Almaty, Astana, Qaraǵandy, Aqtaý, Aqtóbe jáne Oral qalasynan 40-tan astam sportshy qatysyp, baq synaıdy.

Birinshi kýbokke daıyndyq aıasynda Almatyda 6-16 naýryz aralyǵynda tennısshilerdiń sheberligin arttyrýǵa arnalǵan oqý-jattyǵý jıyny ótedi.

Doda qorytyndysy boıynsha bıylǵy maýsym aıynda Italııada «Alghero Open» halyqaralyq týrnırinde el namysyn qorǵaıtyn sportshylar anyqtalady.

Qajetti upaıdy jınaǵan jaǵdaıda qazaqstandyq paratennısshiler 23 qyrkúıek – 8 qazan aralyǵynda Hanchjoýda (Qytaı) bolatyn Parazııa oıyndaryna qatysýǵa múmkindik alady.

Eske sala keteıik, budan buryn Elena Rybakınanyń Dýbaı jarysynyń úshinshi aınalymyna ótkenin jazǵan bolatynbyz.

Foto: Qazaqstan tennıs federatsııasy