Alǵash ret kókpardan QR Qarýly Kúshteriniń shtattyq komandasy quryldy (FOTO)

ASTANA. QazAqparat - QR Qorǵanys mınıstrligi Armııa ortalyq sport klýbynda alǵash ret ulttyq sport túri «Kókpar» boıynsha shtattyq komanda quryldy. Qarýly Kúshteriniń quramasy AOSK-nyń armııalyq sportshylary men taýly-egerlik polktiń áskerı qyzmetshilerinen jasaqtalǵan, dep habarlady QR QM baspasóz qyzmeti.

Armııa ortalyq sport klýby ókilderiniń aıtýynsha, osyndaı sport túriniń engizilýi men shtattyq komandanyń qurylýy armııalyq sportshylarǵa sporttyń bul túrinde óner kórsetip qana qoımaı, sonymen birge, kásibı mamandardy daıarlaýǵa múmkindik beredi. Óıtkeni, qazaqstandyq armııada taýly jaǵdaıda jaýyngerlik arnaıy operatsııalarǵa qatysý úshin arnalǵan jekelegen bólimshe, ıaǵnı, jekelegen taýly-egerlik polk bar.

Búgin, Astanada kókpardan armııalyq quramanyń alǵashqy oıyny ótti. Dostastyq týrnırinde armııashylar Qaraǵandy oblysynyń quramasymen teke tireske tústi.

«Kókpardan qurama komanda qurýdaǵy negizgi maqsat Qarýly Kúshter boıynsha respýblıkalyq jáne halyqaralyq deńgeıdegi saıystarda óner kórsetý», - dedi Sport komıtetiniń tóraǵasy - QR QM AOSK-nyń bastyǵy Aıtalap Qorǵambaev.

Alǵashqy oıyn 3:1 esebimen armııalyq sportshylardyń jeńisimen aıaqtaldy. «Ómirimdi áskerı ispen baılanystyramyn dep eshqashan oılamappyn. Alaıda, AOSK-da kókpardan komanda jasaqtalǵanyn estip, men sporttyq rotada qyzmet etýge keldim», - dedi AOSK sporttyq rotasynyń merzimdi qyzmettegi sarbazy Danııar Ǵallınurov atap ótti.

Taýly-egerlik polktiń serjanty Azat Jıdebekovtiń aıtýy boıynsha, polkte qyzmet etý úshin áskerı qyzmetshiler atqa minýdiń qyr-syryn bilýi, sondaı-aq dene jáne jaýyngerlik daıarlyǵy da keremet bolýy tıis. Sondyqtan bolar, kókparmen shuǵyldanatyn bozbalalar, ásirese, at qulaǵynda erkin oınaıtyn aýyl balalary áskerge keledi. Bul bozbalalardyń merzimdi áskerı qyzmet ótkergennen keıin taýly-egerlik polkte nemese QR QM Armııa ortalyq sport klýbynda qyzmet etýge barlyq múmkindikteri bar.