Alǵash ret qazaqstandyq Londonnyń Qurmetti mýzykanttar qaýymdastyǵynyń Kúmis medalin ıelendi
«Bolashaq» baǵdarlamasynyń stıpendıaty Rahat-Bı Ábdisaǵın 2024 jyly Londonnyń Qurmetti mýzykanttar qaýymdastyǵynyń bedeldi Kúmis medalin alǵan alǵashqy qazaqstandyq atandy. Bul Ulybrıtanııanyń eń kóne jáne mańyzdy marapattarynyń biri. Saltanatty marapattaý rásimi qarasha aıynyń ortasynda Ulybrıtanııa astanasynda ótti.
1889 jyly negizi qalanǵan Kúmis medal jyl saıyn Ulybrıtanııanyń jetekshi konservatorııalarynyń eń úzdik jas mýzykanttaryna beriledi.
2024 jyl Rahat-Bı Ábdisaǵınniń shyǵarmashylyq mansabyndaǵy aıtýly jyl boldy. Aqpan aıynda ol Ulybrıtanııanyń tórt soborynda The Bruce operasynyń álemdik premerasyn usyndy. Bul opera — Rahat-Bıdiń «Bolashaq» baǵdarlamasy boıynsha Shotlandııanyń Koroldik konservatorııasy men Sent-Endrıýs ýnıversıtetindegi doktorlyq zertteýiniń mańyzdy bóligi sanalady.
Sonymen qatar, Rahat-Bıdiń «Kvanttyq mehanıka jáne avangardtyq mýzyka» atty kitaby nemistiń bedeldi Springer baspasynan jaryq kórdi. Fızıka men eksperımentaldy mýzykanyń toǵysqan jerindegi bul biregeı zertteý ǵylymı jáne mýzykalyq ortada úlken qyzyǵýshylyq týdyrdy. Avtor kitabyn Nıderland pen Germanııanyń jetekshi ýnıversıtetterinde, sonyń ishinde Geıdelberg pen Amsterdamda tanystyrdy. Budan bólek, kitap Ulybrıtanııanyń eń tanymal jáne iri kitap dúkenderiniń biri — Oksfordtaǵy basty kitap dúkeniniń sórelerine qoıyldy.
«Matematıka, fızıka jáne mýzykanyń arasyndaǵy tereń baılanysty kórsete alǵanyma qýanyshtymyn. Bul óner men ǵylymdaǵy jańa ıdeıalarǵa shabyt beredi», — dedi kompozıtor tanystyrý barysynda.
Aıta keteıik, Rahat-Bı Ábdisaǵın — Eýropa, Azııa jáne Amerıkadaǵy áıgili kontsert zaldarynda oryndalatyn 150-den astam mýzykalyq shyǵarmalardyń avtory.
Buǵan deıin Qazaq ulttyq horeografııa akademııasynyń stýdentteri halyqaralyq baıqaýda jeńiske jetkenin jazdyq.