Alǵash ret bizge ákimdi ózimiz tańdaý quqyǵy berildi – saılaýshylar

QARAǴANDY. QazAqparat – Qaraǵandy oblysynda 75 aýyl ákimi saılanady. Saılaý 13 aýylda, 17 kentte jáne 45 aýyldyq okrýgte ótýde. 149 saılaý ýchaskesinde daýys berý tańǵy jetiden bastaldy. Saǵat 12:00-ge deıingi jaǵdaı boıynsha saılaýǵa kelý 23% qurady, dep habarlaıdy QazAqparat tilshisi.

Abaı aýdanynda 11 saılaý ýchaskesiniń beseýi 12 myń halqy bar Topar kentine tıesili. Tańerteńnen beri adamdar ózderi jalǵyz jáne otbasylarymen kelip jatyr.

«Bizdiń saılaý ýchaskemizde 1 410 saılaýshy tirkelgen. Tańerteńnen belsendilik qalypty. Jaǵdaı tynysh. Alǵashqylardyń biri bolyp qart adamdar daýys berýge keldi. Keıbireýlerine úıge baramyz, 22 adam ótinish berdi. Básekelestik jaqsy – Topar ákimi laýazymyna bes kandıdat úmitti. Halyq eń laıyqtysyn tańdaıdy dep oılaımyn», – deıdi № 431 saılaý ýchaskesi komıssııasynyń tóraıymy Irına Sergeeva.

Daýys berý uıymdastyrylǵan úı-jaıda sanıtarııalyq talaptar saqtalady. Kire beriste kelýshilerdiń temperatýrasy ólshenedi. Árqaısysyna jeke qalam beriledi. Múmkindigi shekteýli jandar úshin jeke oryn uıymdastyrylǵan. Bul saılaý erekshe, deıdi Topar turǵyny Qaırolla Áýbákirov.

«Aýylda 1971 jyldan beri turamyn. Osy ýaqyt ishinde kóp nárse ózgerdi. Alǵash ret bizge ákimdi tańdaý quqyǵy berildi. Bul halyqqa janashyr bolyp, bizdiń ómirimizdi jaqsarta alatyn adam bolýy tıis», – dep atap ótti qart turǵyn.

Zeınetker Petr Lanshakov ta saılanǵan ákim jerlesteriniń jaılylyǵyn oılastyryp, múddesin qorǵaıtynyna senimdi.

«Áıelimmen birge daýys berýge keldim. Men munda elý jyldan astam ýaqyt turamyn, energetıka salasynda jumys istedim, osy eldi mekenniń ár kóshesin jaqsy bilemin. Bıylǵy jyly kentti abattandyrý, joldardy jóndeý, jaıaý júrginshiler jolyn salý qolǵa alyndy. Bul jaqsartý jumystary jalǵasýy kerek», – deıdi saılaýshy.

Daýys berý barysyn táýelsiz baqylaýshylar baqylaıdy.

«Belsendilik jaqsy ekeni qýantady. Týǵan aýylymyzdyń damýy azamattyq ustanymǵa jáne tańdaýǵa baılanysty bolady. Muny adamdar túsinýi mańyzdy. Men ózim Topardyń týmasymyn. Men týǵan jerimniń bolashaǵyna beı-jaı qaramaımyn. Ázirge baqylaýshylar tarapynan eshqandaı eskertý joq. Tek bir aıtarymyz, saılaýda jergilikti turǵyndar ǵana úmitker bolǵany abzal. Sebebi adamdy kópten beri jaqsy bilseń, oǵan degen senim de joǵary bolady», – dep pikirimen bólisti etnomádenı birlestiktiń ókili Elena Kısler.

Shalǵaı Ulytaý aýdanynda saılaý alty aýyldyq okrýg pen bir kentte ótedi. Sarlyq aýylyndaǵy №701 saılaý ýchaskesinde alǵashqylardyń biri bolyp 85 jastaǵy Alpys Kazıeva óz tańdaýyn jasady.

«Men búgingi saılaýǵa qatysyp, óz daýysymdy berdim. Otanymyz gúldene bersin! Eń bastysy – beıbitshilik pen qaýipsizdik», – deıdi Alpys apa.