Alǵash ret ana atanǵan túrik qyzy qazaqstandyq dárigerlerge alǵysyn bildirdi

<p>Qazaqstanǵa kóship kelgen túrkııalyq otbasy eki jyldan soń alǵash ret sábıli boldy. Shymkent qalalyq perınataldyq ortalyǵynyń dárigerleri shala týǵan náresteniń ómirin saqtap qaldy. Telejúrgizýshi Láılá Sultanqyzy jas bosanǵan anamen suhbat qurdy, dep habarlaıdy <a href="https://kaz.inform.kz/" target="_blank" rel="noopener">Kazinform.&nbsp;</a></p>

Osydan eki aı buryn Shymkent qalalyq perınetaldyq ortalyǵynda Týba Demıraı esimdi túrik eliniń azamatshasy 28 aptasynda ota arqyly dúnıege perzent ákelgen bolatyn. Otany bilikti hırýrg Mýslım Gasanov jasady. 

«Ýaqytynan buryn ota jasaýǵa ishtegi sábıdiń júrek qaǵysynyń nasharlaýy sebep boldy», - deıdi dárigerler. 

Osylaısha, bilikti mamandardyń arqasynda 985 gramm salmaqpen Kýmsal Ada esimdi sábı ómirge keldi. On apta erte jaryq dúnıe esigin ashqan náreste bir aptaǵa jýyq jansaqtaý bóliminde bilikti neonatolog Aqzat Sholpanqulovanyń baqylaýynda boldy. Medıtsınalyq kórsetkish boıynsha alǵashynda sábıdiń ómir súrý múmkindigi 100/35 paıyzdy quraǵan. Shymkenttik dárigerlerdiń kásibı biliktiliginiń arqasynda búginde ana men balanyń jaǵdaıy jaqsarǵan. Kýmsal Ada 1 715 gramm salmaqqa jetti. 

«Ana bolǵym keledi» baǵdarlamasynyń avtory Láılá Sultanqyzy 24 jastaǵy Týba Demıraımen perzenthanada tildesti. Týba suhbatta óziniń tuńǵyshynyń júktiliktiń 26 aptasynda Túrkııada júrgen kezde shetinep ketkenin aıtyp, kózine eriksiz jas aldy. Joldasy Bedre Mýsa ekeýi eki jyl buryn Ystambuldan Shymkent qalasyna qonys aýdarǵanyn, búginde kásippen aınalysyp jatqanyn tilge tıek etti. Otbasylyq jup birinshi kezekte Shymkent qalalyq perınataldyq ortalyǵynyń ujymyna  alǵysyn bildirdi.

Aıta keteıik, suhbattyń tolyq nusqasyn qarasha aıynda «Jibek joly» arnasyndaǵy «Ana bolǵym keledi» baǵdarlamasynan kóre alasyzdar.