Alǵa basýdyń kepili ne?

ASTANA. QazAqparat - Elimizde ınvestıtsııa tartýǵa, iri kásiporyndarǵa qajetti zattardy shaǵyn jáne orta bıznes nysandaryna ornalastyrý arqyly ımporttyń úlesin azaıtýǵa baǵyt ustalýda. Bul baǵytta óńirde qurylǵan ındýstrııalyq aımaqtardyń úlesi mol bolmaq. «Aqtóbe» ındýstrııalyq aımaǵy óz jumysyn ótken jyly bastaǵan bolatyn. Memleket tarapynan ındýstrııalyq aımaqta ınfraqurylym júrgizýge 5 mıllıard teńge qarjy bólindi. Osynshama qarjyǵa aımaqqa gaz, elektr, sý jetkizilip, tas jol men temirjol salyndy. Bir sózben aıtqanda «Aqtóbe» ındýstrııalyq aımaǵyna tolyqtaı ınfraqurylym júrgizilip, shaǵyn jáne orta bıznes nysandarynyń jumys oryndaryn ashýlaryna barlyq jaǵdaı jasaldy, dep jazady «Egemen Qazaqstan» gazeti.

Mine, ındýstrııalyq aımaqtyń ıgiligin paıdalana otyryp, daǵdarys jaǵdaıynda damýǵa baǵyt ustaǵan kásipkerlerdiń bir toby jańa óndiris oryndaryn ashýǵa bel býǵan eken. Munda bir kúnde quny 10 mıllıard teńge bolatyn bes birdeı óndiris ornynyń qurylysy bastaldy.

- Bizdiń «Aqtóbe» áleýmettik kásipkerlik korporatsııasy da osynda qonys aýdardy. Korporatsııa ındýstrııalyq aımaqqa kásipkerlerdi tartý boıynsha jumystardy belsendi júrgizýge yqpal etýde. Biz belsendi marketıngtik jumystar júrgizdik, ózimizdiń jańa saıtymyzdy ashtyq. Áleýmettik jelilerde paraqshalarymyzdy ashyp, óz múmkindigimizdi ashyp kórsettik. Sonyń nátıjesinde bastapqy kezeńde ǵana quny 24 mıllıard teńge bolatyn 9 ótinish tústi, búgingi tańda solardyń arasynan óńirlik komıssııanyń qoldaýyna ıe bolǵan bes jobanyń jumysyn bastaǵaly otyr, - deıdi «Aqtóbe» áleýmettik-kásipkerlik kor­poratsııasynyń basshysy Qaırat Bekenov bizben áńgimesinde.

Indýstrııalyq aımaqta ornalasatyn ká­sip­oryndar úshin elektr qýaty men gaz ana­ǵurlym arzanǵa túsedi.  Munyń ózi ınves­tor­lar úshin úlken qoldaý bolyp otyrǵany sózsiz.

«Aqtóbe» ındýstrııalyq aımaǵynda bas­taý alǵan  bes  óndiris ornynyń irgetasyn qalaý saltanatty sharasyna oblys ákimi Berdibek Saparbaev qatysyp, kásiporyndar qurylysynyń bastalǵanynyń belgisi retinde kapsýl saldy.

Іri jobalardyń biri quny 6 mıllıard  teńge bolatyn «Zerde Keramıka Aktóbe» JShS ıtalıalyq tehnologııa boıynsha keramogranıt pen keramıkalyq plıtalar shyǵarady. Bul joba 2017 jyldyń aıaǵyna taman paıdalanýǵa beriledi. Kásiporyn jylyna 5 mıllıon sharshy metr keramogranıt jáne keremıka plıtalaryn óndiredi. Munda eki ıtalııalyq jeli ornatylady. Joba iske qosylǵanda 180 adam eńbek etedi.

- Bizdiń «Zerde» kompanııalar tobynyń Shymkent qalasynda jumys istep turǵan osyndaı kásiporyny bar. Onyń jyldyq qýaty 1,8 mıllıon sharshy metr keramogranıt jáne keramıka plıtalaryn shyǵarýǵa eseptelgen.  Bizdiń tańdaýymyzdyń Aqtóbege túsý sebebi, munda elektr qýaty men gazben qamtý anaǵurlym arzan, sondaı-aq, jaqyn ornalasqan shıkizat ken oryndary bar. Ornalasqan jeri de kásiporynnyń damýyna qolaıly, Reseıge jaqyn, shıkizat jáne basqa materıaldardy jetkizý arzanǵa túsedi. Biz óndiretin keramogranıt jáne keramıka plıtalary Reseıdegi, Túrkııadaǵy jáne Qytaıdaǵy básekelesterimizge qaraǵanda sapaly da arzan bolady. Óndirilgen ónimniń 30 pa­ıyzy eksportqa, 70 paıyzy ishki naryqqa shyǵarylady. Bul bizdiń tez arada jobalyq qýatqa shyǵýymyzǵa alǵyshart jasaıdy,-deıdi «Zerde» kompanııalar tobynyń bas dırektory Muhtar Bıtemirov.

Al «PolıVest» JShS - burynnan jumys istep kele jatqan kásiporyn. Alaı­da, ǵımaratty jalǵa alyp kelgen. Endi óz aldyna  shańyraq kótermekshi. Sol úshin 1 gektar jer alyp, medıtsınaǵa jáne saýdaǵa qajetti polıetılen paketterin shyǵaratyn zaýyt salýǵa kirisip otyr. Bolashaqta taǵy bir gektar jer alyp, óndirisin keńeıtýge baǵyt ustaýda. Qazirdiń ózinde elimizdiń Atyraý, Astana jáne Qaraǵandy qalalaryna ónimderin ótkizýde. Kórshiles Reseıdiń Samar oblysyna da shyǵarýda. Munda 60 jańa jumys orny ashylady. Aıyna 100 tonna polıetılen paketteri shyǵarylady. Bul kásiporyn shyǵaratyn polıetılen paketter ekologııalyq taza ónim bolyp tabylady.

«FIBC Kazakhstan» JShS polıetılen men polıpropılennen qoraptar, iri ónerkásip mekemeleri úshin jumsaq konteınerler óndiredi. «Talan Technology» kompanııasy jaramsyz bolyp qalǵan avtomobıl dóńgelekterin óńdep,  sport uıymdaryna qa­jetti taqta tósenishter, al «Aqtóbe TOPSA Plast» áınek jýatyn suıyqtyq pen antıfrız, eritkishter men hımııalyq reagentter shyǵarýmen aınalysady.

Qurylys jumystary bastalyp otyrǵan jobalardyń jalpy quny 10 mıllıard teńgeden asady. Atalǵan jobalar júzege asyrylǵanda bıýdjetke  jylyna shamamen 1 mıllıard teńge salyq túsedi, 315 jumys orny ashylady dep kútilýde.

Saltanatty sharadan keıin oblys ákimi Berdibek Saparbaev «Aqtóbe» ÁKK ókilderi, memlekettik mekemeler, iri kásiporyndar basshylarymen jáne bıznes ókilderimen «Aqtóbe» ındýstrııalyq aımaǵynda jańa óndiristik qýattardy iske qosý máselelerine arnalǵan  keńes ótkizdi. Keńeste ol óńirde kásipkerlikti damytýdyń  múmkindigi mol ekenine aıryqsha toqtalyp, iri kásiporyndar arasynda qazaqstandyq úlesti arttyrýdyń,  ımporttyń úlesin azaıtýdyń áli dittegen deńgeıge kóterilmeı otyrǵanyn synǵa aldy. Bul baǵytta jumysty burynǵydan da shırata túsý qajettigin qadap aıtty. Jıynda «Aqtóbe» ındýstrııalyq aı­maǵynyń múmkindikterin tıimdi paıdalaný, ónerkásiptik klaster qurý jáne kásipkerlik qyzmetti arttyrý maqsatynda iri kásiporyndar men shaǵyn jáne orta bıznestiń áriptestik qatynasyn damytý jaıy áńgime ózegine aınaldy.

Óńir basshysy ındýstrııalyq  aýmaqtyń byltyr qoldanysqa berilgenin, alaıda kúni búginge deıin onyń aýmaǵynda birde-bir jobanyń júzege asyrylmaǵanyn atap ótti.

- 5 mıllıard  teńge jumsalǵan ınfra­qurylym jumysy bos turyp qaldy, keıbir jabdyqtary qoldy boldy. «Aqtóbe» ÁKK-ge ınvestorlar tartý jóninde tapsyrma berildi. Sonymen birge, iri kompanııalardyń basshylaryna shaǵyn jáne orta bızneske kómektesýlerin suradyq. Bul jumystyń tıimdiligi kózge kórinip tur. Búginde 5 jańa óndiris ornynyń irgetasy qalandy, - dedi oblys basshysy.

Shara sońynda oblys ákimdigi jáne kásip­oryndar basshylary arasynda júzege asyrylǵaly otyrǵan jobalar boıynsha memorandýmdarǵa qol qoıyldy.

Satybaldy SÁÝІRBAI,

«Egemen Qazaqstan»

Aqtóbe oblysy