Áleýmettik jelide synǵa ilikken BQO tabıǵatty qorǵaý prokýrory qyzmetinen bosatyldy

<p>ORAL. KAZINFORM &ndash; BQO mamandandyrylǵan tabıǵatty qorǵaý prokýrory Abylaı Bısqalıev qyzmetinen bosatyldy.</p>

BQO prokýratýrasynyń baspasóz qyzmetinen málim etkenindeı, áleýmettik jelide beınejazba taraǵannan keıin qyzmettik tekserý júrgizildi.

Anyqtalǵanyndaı, A.Bısqalıev 12 tamyz kúni jumys ornynda bolǵan, medıtsınalyq kýálandyrý onyń ishimdik ishpegendigin kórsetken.

Obektıvti sebepterge baılanysty foto men beınejazbanyń qashan túsirilgenin anyqtaý múmkin bolmady. Degenmen atalmysh jaıt qoǵamdyq pikir týǵyzyp, áleýmettik jeli qoldanýshylary men aqparattyq ınternet kózderi oqyrmandarynyń kóptegen pikirtalasyna túrtki boldy.

«15 tamyz kúni qyzmettik tekserý nátıjesi men oblys prokýratýrasy tártiptik komıssııasynyń usynysyna sáıkes A.Bısqalıev qyzmetine tolyq sáıkes emestigi týraly eskertý túrindegi tártiptik jaýapkershilikke tartyldy. Sonymen qatar A.Bısqalıev memlekettik qyzmetshige qoıylatyn joǵary talapty túsine otyryp, basshylyq atyna ózin qyzmetinen bosatý týraly ótinish jazdy. 20 tamyzda A.Bısqalıev BQO mamandandyrylǵan tabıǵatty qorǵaý prokýrory qyzmetinen bosatyldy», - dep habarlady vedomstvodan. 

Eske sala keteıik, budan buryn BQO-da tabıǵatty qorǵaý prokýroryna qatysty qyzmettik tekserý júrgizilip jatqanyn jazǵan bolatynbyz.