Áleýmettik jelide dinı mazmundaǵy sýret júktegen Atyraý turǵynyna aıyppul salyndy

<p>ATYRAÝ. KAZINFORM &ndash; Atyraýlyq áıel áleýmettik jelidegi paraqshasyna dinı mazmundaǵy sýretti júktegen. Onyń bul áreketi dinı qyzmet jáne dinı birlestikter týraly zańnamaǵa qaıshy ekeni anyqtalǵan.</p>

Atyraý qalasynyń ákimshilik quqyq buzýshylyqtar jónindegi mamandandyrylǵan sotynda elimizdegi dinı qyzmet jáne dinı birlestikter týraly zańnamany buzǵan áıelge qatysty is qaraldy. «V kontakte» áleýmettik jelisin qoldanýshynyń bul áreketi QR Ákimshilik quqyq buzýshylyq týraly kodeksiniń 490-babynyń 1-bóliginiń 3-tarmaǵymen saralanǵan.

«Sotta anyqtalǵandaı, azamatsha A. «V kontakte» áleýmettik jelisindegi jeke paraqshasyna dinı mazmundaǵy sýret júktep, ashyq túrde ornalastyrǵan. A.-nyń kinási sot otyrysynda zerttelgen is materıaldarymen, ákimshilik quqyq buzýshylyq týraly hattamamen, maman qorytyndysymen, saýalnama hattamasymen rastaldy. Sot qaýlysymen A. ákimshilik quqyq buzýshylyq jasaǵany úshin kináli dep tanyldy. Oǵan qyzmetin úsh aı merzimge toqtata turyp, 129 myń 220 teńge mólsherinde ákimshilik aıyppul salyndy», - dep habarlady oblystyq sottyń baspasóz qyzmeti.

Sot qaýlysy zańdy kúshine endi.

Eske sala ketelik, buǵan deıin Atyraýda qarjy pıramıdasyn qurǵan zeınetkerge sot úkimi shyqqanyn jazǵan bolatynbyz.