Áleýmettik kásiporyndar kóbinese granttar men qaıyrymdylyqqa táýeldi - Máýlen Áshimbaev
Memleket basshysynyń quttyqtaýynda áleýmettik kásipkerlerdiń Eýrazııa quryltaıy belsendi, azamattyq ustanymy aıqyn, qoǵamda ıgi qundylyqtardyń ornyǵýyna atsalysyp júrgen kásipkerler, sarapshylar jáne kóshbasshylar bas qosatyn biregeı dıalog alańy ekeni aıtylǵan.
«Áleýmettik kásipkerlik álem ekonomıkasynyń mańyzdy qyry sanalady. Osy baǵyttaǵy bastamalar ınklıýzıvti orta qalyptastyrý jáne múmkindigi shekteýli jandardyń turmys sapasyn jaqsartý isinde erekshe ról atqarady. Qazaqstanda áleýmettik kásipkerlikke aıryqsha mán beriledi, oǵan jan-jaqty qoldaý kórsetiledi. Sonyń arqasynda bıznestiń jasampazdyq pen janashyrlyqqa negizdelgen osy túri elimizde qarqyndy damyp keledi. Bul salanyń ókilderi túrli máseleniń túıinin tarqatatyn ınnovatsııalyq tásilder usynyp júr. Búgingi basqosýda da salmaqty oılar men salıqaly pikirler aıtylady dep senemin. Forým Eýrazııa halyqtary arasyndaǵy seriktestikti nyǵaıtýǵa serpin berip, ózara yqpaldastyqty arttyra túseri sózsiz», — delingen el Prezıdentiniń quttyqtaý hatynda.
Máýlen Áshimbaev óz sózinde qazir álemde ýaqyt ótken saıyn áleýmettik kásipkerlikke suranys artyp kele jatqanyn atap ótti. Áleýmettik máselelerdi sheshýge baǵyttalǵan bıznes ınvestorlar, memlekettik qurylymdar jáne jalpy qoǵam tarapynan kóbirek qoldaýǵa ıe.
Bul rette Qazaqstan da bıznestiń atalǵan sanatyn ornyqty damýdyń ulttyq strategııasynyń bir bóligi retinde maqsatty ári júıeli negizde qoldap, órkendetip keledi. Senat Tóraǵasy Memleket basshysynyń bastamasymen osy baǵytta naqty sharalar qabyldanǵanyn jáne áleýmettik kásipkerlikti qoldaý jóninde zańnamalyq ózgerister engizilgenin atap ótti. Nátıjesinde byltyrdan bastap áleýmettik kásipkerlik sýbektileriniń tizilimine tirkelgen kompanııalardyń sany aıtarlyqtaı artqan.
«Áleýmettik kásipkerler ózekti qoǵamdyq máselelerdi sheshý jolynda memlekettiń mańyzdy seriktesteri ekenin atap ótken jón. Prezıdentimiz Qasym-Jomart Kemeluly Toqaevtyń tapsyrmasymen „Áleýmettik kásipkerlik týraly“ zań ázirlenip, qabyldandy. Sondaı-aq Áleýmettik kodekske tıisti ózgerister engizildi. Bul alǵash ret áleýmettik kásipkerler qyzmetiniń quqyqtyq mártebesin anyqtaýǵa jáne oǵan qajetti quqyqtyq negiz qalyptastyrýǵa jol ashty. Osyǵan baılanysty áleýmettik kásipkerler memleket tarapynan qarjylyq, ınfraqurylymdyq jáne konsýltatsııalyq qoldaý alý múmkindigine ıe boldy», — dedi Palata spıkeri.
Degenmen, Máýlen Áshimbaev atap ótkendeı, áleýmettik kásipkerlik salasynda birqatar ózekti syn-qaterler bar. Olardy eńserý úshin keshendi jumys jáne barlyq múddeli taraptyń is-áreketinde biryńǵaı tásil qajet. Osyǵan baılanysty Senat Tóraǵasy áriptesterin Memleket basshysynyń tapsyrmasymen qurylǵan Ornyqty damý salasyndaǵy ulttyq maqsattar men mindetterdiń iske asyrylýyna monıtorıng júrgizý jónindegi parlamenttik komıssııa aıasyndaǵy úsh mindet tóńireginde birlesip jumys isteýge shaqyrdy.
«Áleýmettik kásiporyndar kóbinese granttar men qaıyrymdylyqqa táýeldi. Sondyqtan áleýmettik jobalardy qoldaý úshin mıkroqarjylandyrý tetikterin jáne basqa mehanızmderdi damytýdyń mańyzy zor. Oqytý jáne tálimgerlik baǵdarlamalaryn iske asyrý áleýmettik kásipkerlikti qoldaý men damytýdyń negizgi baǵyttarynyń biri bola alady. Sondaı-aq óńirlerdegi áleýmettik-kásipkerlik korporatsııalary janynan jumys isteýge qolaıly keńistik usynyp qana qoımaı, konsýltatsııalyq qyzmetterdi, oqytý men trenıngterdi jáne qarjylandyrýǵa qol jetkizýdi qamtamasyz etetin arnaıy ınfraqurylym qalyptastyrǵan abzal. Parlament depýtattary osy jáne basqa da máselelerdi sheshý úshin áleýmettik kásipkerlermen, sondaı-aq, barlyq múddeli tarappen birlesip, belsendi jumys isteýge múddeli», — degen Máýlen Áshimbaev áleýmettik kásipkerler men el erteńine beı-jaı qaramaıtyn belsendi azamattardyń bastamalaryna odan ári qoldaý kórsetýge daıyn ekenin jetkizdi.
Quryltaı barysynda aýyldarda áleýmettik kásipkerlikti damytý jóninde usynystar, sapaly bilim men densaýlyq saqtaýǵa qoljetimdilikti arttyrýǵa qatysty birlesken jobalar boıynsha tyń bastamalar jáne salany odan ári jetildirýge arnalǵan utymdy pikirler aıtyldy. Іs-sharada Áleýmettik ınnovatorlar qaýymdastyǵynyń prezıdenti Emın Askerov, Ulttyq ekonomıka mınıstrliginiń, Astana qalasy ákimdiginiń jáne Eýrazııalyq top basshylyǵynyń ókilderi, sondaı-aq, Reseıden, Tájikstannan, Ózbekstannan jáne halyqaralyq uıymdardan kelgen qatysýshylar sóz sóıledi.
Aıta keteıik, Eýrazııalyq quryltaı aıasynda áleýmettik kásipkerlerge arnalǵan túrli formattaǵy is-sharalar, onyń ishinde taqyryptyq trenıngter, kórmeler men jármeńkeler ótkizý josparlanǵan.