Áleýmettik azyq-túlik ónimderiniń baǵasy tórtinshi apta qatarynan tómendep keledi

<p><strong>ASTANA. KAZINFORM &ndash; Bir aptadaǵy áleýmettik mańyzy bar azyq-túlik baǵasynyń jaǵdaıy senbi, 22 maýsymda vıtse-premer Serik Jumanǵarınniń tóraǵalyǵymen ótken Úkimet otyrysynda talqylandy.&nbsp;</strong></p>

10 taýar tobyna baǵanyń tómendeý úrdisi jalǵasýda: qaraqumyq jarmasy – 0,9%, kúnbaǵys maıy – 0,5%, qyryqqabat – 0,4%, sıyr eti, tuz jáne qant – 0,3%, kúrish – 0,2%, makaron, súzbe jáne un – 0,1%. Saýda jáne ıntegratsııa birinshi vıtse-mınıstri Aıjan Bıjanova atap ótkendeı, baǵa 8 oblysta tómendegen, onyń ishinde Ulytaý (0,8%), Aqtóbe (0,6%) jáne Atyraý (0,5%) oblystarynda aıtarlyqtaı arzandady. Jalpy, bir apta ishinde áleýmettik azyq-túlik baǵasynyń ortasha ındeksiniń tómendeýi – 0,1%. Bul kórsetkish tórtinshi apta qatarynan tirkelip otyr. Bir aıda dınamıka 0,3% qurady.

Aýyl sharýashylyǵy vıtse-mınıstri Erbol Tasjúrekov óńirlerde erte ónim jınaý kelisimshartynyń barysyn aıtty. Úsh megapolıs – Astana, Almaty, Shymkent – maýsymaralyq kezeńde kókónisterdi turaqty baǵamen jetkizý úshin eldiń jeti óńirinen aýyl sharýashylyǵy óndirýshilerimen tikeleı kelisimsharttar jasaı bastady. 

«Astana qazirdiń ózinde 15 myń tonna kókóniske: kartop, pııaz, qyryqqabat, sábizge forvardtyq kelisimsharttar jasasty. Shymkent – 7,5 myń tonnaǵa, Almaty – 16 myń tonnaǵa. Jetkizý maýsym-shilde, qyrkúıek-sáýir aralyǵyna josparlanǵan. Sondaı-aq kúzgi ónimdi jetkizýge qosymsha forvardtyq sharttar jasalatyn bolady», - dep málimet etti vıtse-mınıstr. 

Sondaı-aq Erbol Tasjúrekov óńirlerge áleýmettik mańyzy bar azyq-túlik taýaryna baǵany turaqtandyrý tetikterin iske asyrý qaǵıdalarynda belgilengen qarjylandyrý merzimi men sharttaryn, onyń ishinde aýyl sharýashylyǵy taýaryn óndirýshiler men qaıta óńdeý kásiporyndaryn qarjylandyrýdyń 70% baǵyty boıynsha talaptardy saqtaý qajettigin atap ótti.