Áleýmettik ámııan: 2025 jyldan qazaqstandyqtardy ne kútip tur
«Áleýmettik ámııan» jobasy – 2020 jyly qolǵa alyndy, atap aıtqanda, koronavırýs indeti etek jaıǵan kezde, jumyssyz qalǵan azamattarǵa áleýmettik qoldaý retinde 42 500 teńgeden berile bastady. Degenmen kóp azamat esepshotty ashý jaǵynan qıyndyqqa tap boldy.
2020 jyly Memleket basshysy Qazaqstan halqyna joldaýynda áleýmettik tólemder júıesin tsıfrlandyrý qajettigin aıta kele, áleýmettik ámııan engizý bastamasyn kóterdi.
Joba ótken jyldan beri azamattardyń jekelegen sanattaryn dári-dármekpen qamtamasyz etý, mektep oqýshylaryn tegin jáne jeńildikpen tamaqtandyrý qyzmetter usynyp, pılottyq rejımde iske asyrylyp keledi. «Áleýmettik ámııan» qyzmetin paıdalaný úshin App Store jáne Play Market dúkenderinde qoljetimdi eGov Mobile qosymshasyn júktep alý qajet.
Prezıdent tapsyrmasy boıynsha Úkimet 2025 jyldan bastap «Áleýmettik ámııan» jobasyn tolyqtaı engizý jumystaryna kirisip ketti.
«Tsıfrlyq damý, ınnovatsııalar jáne aeroǵarysh ónerkásibi mınıstrligi, Eńbek jáne halyqty áleýmettik qorǵaý mınıstrligi, Densaýlyq saqtaý mınıstrligi jáne Oqý-aǵartý mınıstrligi óńir ákimdikterimen birlesip, 2025 jylǵy 1 qańtardan bastap Áleýmettik ámııannyń engizilýin qamtamasyz etsin. Tıisinshe, 1 jeltoqsanǵa deıin Áleýmettik ámııanǵa kiretin memlekettik qyzmetter tizilimin bekitý kerek», - dedi Premer-Mınıstr Oljas Bektenov Úkimet otyrysynda.
Jobada ár otbasyǵa áleýmettik mártebesine qaraı usynylatyn barlyq memlekettik qoldaý túrleri bolady. Sondaı-aq, qoldaýdyń naqty berilý faktisi negizinde memleket tarapynan kórsetilgen kómek somasy da kórsetiledi.
Oqýshylardy tegin jáne jeńildikpen beriletin tamaqpen qamtý
Oqý-aǵartý mınıstrligi Tsıfrlyq damý, ınnovatsııalar jáne aeroǵarysh ónerkásibi mınıstrligimen birlese otyryp, eGov Mobile mobıldi qosymshasynda «Áleýmettik ámııan» arqyly mektepterde tegin tamaqtandyrý boıynsha pılottyq jobany iske qosty.
Joba ata-analarǵa qyzmetti proaktıvti túrde alýǵa, balalarynyń mektep ashanalaryna barýyn baqylaýǵa jáne jeńildikpen tamaqtaný úshin tsıfrlyq vaýcherlerdi paıdalanýǵa múmkindik beredi.
Balanyń mektepte tamaqtanǵany júıede esepke alynady jáne bul týraly ata-anasy da eGov Mobile mobıldi qosymshasynda «Áleýmettik ámııan» arqyly aqparat alady. Sondaı-aq, ata-ana memlekettik qoldaý sharasynyń sapasy týraly keri baılanys qaldyra alady. Sonyń negizinde qyzmet kórsetý aktisi men tólem shoty jasalady.
Memlekettik qarjylandyrý tamaqtaný faktisi boıynsha júzege asyrylady jáne burynǵydaı bastaýysh synyp oqýshylarynyń sanyna negizdelmeıdi. Osylaısha, áleýmettik ámııan memlekettik qoldaý sharalarynyń ataýy men valıdatsııasyn ashyq kórsetedi.
Qazirgi ýaqytta tamaqtandyrýdy esepke alý jáne tirkeý júıeleri 15 óńirdegi 250 mektepte jumys isteıdi. Jobany keńeıtý úshin mektepterdi tamaqtandyrýdy esepke alý men tirkeý júıelerimen qamtamasyz etý jáne olardy «Áleýmettik ámııan» júıesimen ıntegratsııalaý jumystary júrgizilýde.
Aıta ketsek, pılottyq joba Aqmola, Mańǵystaý oblystarynda jáne Astana men Shymkent qalasynda synaqtan sátti ótti. Odan ári mektepterdiń daıyndyǵyna qaraı birtindep engizilmek.
«Áleýmettik ámııan» arqyly tegin dári-dármekti qalaı alýǵa bolady?
Ol úshin eGov Mobile qosymshasynda tirkeýden ótýi kerek, al buryn tirkelgen bolsa sáıkestendirýi tıis. Ári qaraı, patsıent basty bette «Áleýmettik ámııan» bólimine kirip, «Dári-dármekpen qamtamasyz etý» jolyn tańdaıdy.
Egde jastaǵy nemese servıs qyzmetterin paıdalana almaıtyn azamattar úshin emhanaǵa barǵan kezde Face-ID jáne veb-kameralardyń kómegimen sáıkestendirýden ótý jetkilikti, sodan keıin patsıenttiń qolyna tıisti dári-dármek beriledi.
Densaýlyq saqtaý mınıstrliginiń málimetinshe, «Áleýmettik ámııan» arqyly dári-dármekterdi elektrondyq túrde berý jónindegi pılottyq jobaǵa el boıynsha 700-den astam medıtsınalyq uıym qatysady, 93 myń retsept negizinde preparattar berilgen. Osylaısha, endi naýqastar qaǵaz retsept alý úshin dárigerge jazylýǵa ýaqyt jumsaýdyń qajeti joq, meıirger kezeksiz qajetti preparatty óz betinshe beredi.
Sondaı-aq, vedomstvo syrqat jandardy dári-dármekpen qamtamasyz etýde zańsyz aınalym, burmalaý jáne basqa da zań buzýshylyqtarǵa jol bermeý maqsatynda «Áleýmettik ámııandy» paıdalaný qoljetimdilik pen tolyq ashyqtyqty qamtamasyz etetinin aıtyp otyr.
«Áleýmettik ámııan»: ár azamatqa qandaı memlekettik qoldaý túrleri tıesili ekeni týraly habarlama jiberiledi
Sonymen 2025 jyldan bastap elimizde «Áleýmettik ámııan» jobasy tolyq engiziledi. Qazir atalǵan jobany tsıfrlandyrý protsesi qalaı júrip jatyr? Osyǵan jaýap izdep Tsıfrlyq damý, ınnovatsııalar jáne aeroǵarysh ónerkásibi mınıstrligine resmı saýal joldaǵan edik.
«Memlekettik qyzmetterdi tsıfrlandyrý bizge memlekettik qoldaý sharalaryn alýǵa tıisti azamattardy ǵana emes, olardyń kólemin de anyqtaýǵa múmkindik beredi. Kóptegen azamattar qandaı memlekettik qoldaý sharalary tıesili ekenin bilmeıdi. «Áleýmettik ámııan» - memlekettik qoldaý sharalarynyń barlyq túri týraly habarlaýdyń, usynýdyń jáne esepke alýdyń biryńǵaı platformasy. Bul platformaǵa kezeń-kezeńimen memlekettik qoldaý sharalary kóshiriledi jáne árbir azamatqa qandaı memlekettik qoldaý túrleri tıesili ekeni týraly habarlama jiberiledi», - delingen vedomstvo jaýabynda.
Aqparatta aıtylǵandaı, bul joba tsıfrlyq tehnologııalardy engizý esebinen áleýmettik kómek quraldaryn maqsatsyz paıdalanýǵa jol bermeýge, ıaǵnı tólemderdiń maqsatty jumsalýyn qamtamasyz etýge baǵyttalǵan.
«Osylaısha, azamat memlekettik qoldaýdyń barlyq túrin ǵana emes, sonymen qatar memleket shyǵyndarynyń mólsherin de kóredi», - deıdi mınıstrlikten.
Áleýmettik ámııanǵa túsken tólemderdi qolma qol aqshalaı sheship alýǵa nemese banktegi jeke shotyna aýdarýǵa bolmaıdy
«Bastapqyda «Áleýmettik ámııan» jobasy arqyly aqshalaı emes, naqty sharalar túrinde kórsetiletin memlekettik qoldaý sharalary kórsetiledi. Mysaly, ystyq tamaq, dári-dármek nemese múgedektigi bar adamdarǵa tehnıkalyq quraldar jáne taǵy sol sııaqty qyzmet túrleri. Al memlekettik qoldaý sharalary aıasynda kórsetilgen qyzmetterge jumsalǵan soma qorytyndy esepte kórsetiledi», - dep túsindirdi Tsıfrlyq mınıstrlikten.
«Áleýmettik ámııan» jobasyna tsıfrlyq teńge engizilmek
«Qazirgi tańda Ulttyq bank Qarjy mınıstrligimen birlese tsıfrlyq teńge platformasyn júzege asyrýda. Osy oraıda Qazynashylyq komıtetiniń qatysýymen «Áleýmettik ámııan» jobasy sheńberinde vaýcherlermen tsıfrlyq teńgemen esep aıyrysý múmkindigi beriledi. Bul bastama áleýmettik tólemderdi avtomattandyrý, ákimshilendirý jáne esepke alý protsesterin jedeldetýge, áleýmettik kómektiń aıqyndyǵyn, sonymen qatar úshinshi tulǵalar tarapynan óndirip alý men tyıym salýdan saqtalýyna kepildik beredi», - delingen saýal jaýabynda.
Aıta ketsek, vedomstvonyń bizge usynǵan deregine sáıkes, «Áleýmettik ámııan» jobasy aıasynda memlekettik qoldaý sharalary kezeń-kezeńmen jáne normatıvti-quqyqtyq aktilerdi sáıkestendirýmen qatar júrgiziledi. Osylaısha onyń fýnktsıonaldyǵyn keńeıtý josparlanyp otyr.
Azamattardyń jeke derekteri qalaı qorǵalady?
«Qazirgi ýaqytta «Áleýmettik ámııan» «Elektrondyq Úkimettiń» «e-Gov mobile» mobıldi qosymshasy aıasynda jeke qyzmet retinde iske qosyldy. Osy oraıda azamattardan «Áleýmettik ámııan» jobasyna jeke avtorızatsııa talap etilmeıdi. Jeke derekterdi qorǵaý, saqtaý jáne óńdeý barlyq deńgeıde qamtamasyz etiledi», - dep sendirdi Tsıfrlyq damý, ınnovatsııalar jáne aeroǵarysh ónerkásibi mınıstrligi.
Foto: freepik.com