Áleýmettik jeńildikterge muqtajdardy baǵalaıtyn ındıkatorlar qajet - Dáýren Babamuratov

ALMATY. QazAqparat - Áleýmettik jeńildikterdi júzege asyrý úshin árbir otbasynyń shynymen muqtaj ne muqtaj emes ekendigin baǵalaý boıynsha qosymsha ındıkatorlar qajet. «Nur Otan» partııasynyń kezekti XVIII sezinde aıtylǵan Elbasynyń bastamalary jóninde «Jastar úni» JQB tóraǵasy Dáýren Babamuratov osyndaı pikir bildirdi.

«Sezdegi basym áleýmettik bastamalardy ekige bólýge bolady. Birinshisi sózsiz ár balaǵa beriletin 21 000 teńge, ekinshisi 2-3%-baspanaǵa arnalǵan nesıeler. Meniń túsingenim birinshisi aýyl halqy úshin. Aýylda 100 myń aılyqty tipti armandap kórmegen jáne resmı ondaı jalaqy alýǵa esh múmkindigi joq otbasylar kóp. Álgi jarty mıllıon kóp balaly otbasynyń deni sol jaqta», - dedi Dáýren Babamuratov.

Onyń aıtýynsha, ekinshi bastama kóp balaly otbasylarǵa 2-3% paıyzben beriletin turǵyn úı nesıeleri.

«Bul eki usynysty da oń qabyldadyq. Batyl sheshimder jáne shynymen áleýmettik! Bul eki jospardy júzege asyrý úshin árbir otbasynyń shynymen muqtaj ne muqtaj emes ekendigin baǵalaý boıynsha qosymsha ındıkatorlar qajet bolady dep sanaımyn.

Sonymen qatar, turǵyn-úıge arnalǵan nesıeler múldem jyljymaıtyn múligi joq otbasylarǵa ǵana emes, mysaly, bes balasymen 1 bólmeli páterde turatyn otbasylardyń da osy sanatqa enýine jaǵdaı jasaý kerek dep esepteımin», - dedi Dáýren Babamuratov.

Ol bastamalardy júzege asyrý mehanızmderin jańadan qurylǵan Úkimet halyqtyń áleýmettik jaǵdaıyn eskere otyryp ázirleıdi dep sanaıdy.